«Формула-1» трассасына ақша аямаған облыс жол жөндеуге қаржы іздеп жүр

Ербол Ілияс - 18.10.20191841

Алматы облысындағы  жалпы жолдардың  78 пайызы жақсы және қанағаттанарлық деңгейінде екен. Ал жөндеу көрмеген қалған 22 пайызы – орташа. Өңірде жалпы саны 284 көпір болса, соның 108-і апаттық жағдайда.  Олар алдағы 3 жылда жөнделмек.

Тілшілерге алдағы жылдың жоспарларымен бөліскен Алматы облысының жолаушы көлігі және автомобиль жолдары басқармасының басшысы Ержан Бәкірбайұлының айтуынша, биыл облыстық маңызы бар жолдарды жөндеуге және күтіп ұстауға 20 миллиард 400 миллион теңге бөлінген. Оның 12 миллиарды жергілікті, қалған бөлігі республика бюджеті есебінен берілген. Ол ақшаға облыстық маңызы бар жолдардың 28 шақырымына құрылыс және қайта жаңарту, 60 шақырымына күрделі жөндеу, 193 шақырымына орташа жөндеу және 9 көпірге күрделі жөндеу жасалып жатыр. Биылғы жасалатын жолдардың ұзындығы 360 шақырым. Дегенмен, басқарма басшысының сөзінше, Алматы облысындағы жолдарды толық жөндеп шығу үшін әлі де қомақты қаражат керек.

–Облыстағы жолдардың бұзылуы оларды қалпына келтіруден жылдам жүріп жатыр. Яғни, біз жолдарды жөндеп әлекпіз. Ал олардың бұзылу процесі алдымызды орап тұр. Қазіргі біз сұрап отырған ақша жолды жөндеуге қажет соманың 40 пайызын ғана құрайды. 2006 жылдары облыс жолдарын жөндеуге ақша берілмейтін. Тек күтіп ұстауға ғана 1-ақ миллиард теңге бөлінетін. Келесі жылы 531 шақырым жолды жөндеуге бюджеттен 30 миллиард теңге сұрап отырмыз–-дейді Алматы облысының жолаушы көлігі және автомобиль жолдары басқармасының басшысы Ержан ЖАСЫБАЕВ.

Талдықорғанда өткен халықаралық инвестфорумда облыс әкімі жылына бір мәрте өтпек «Формула-1» жарысының  трасса құрылысы аяқталуға жақын деген еді. Жалпы, «Формула-1» трассасының ұзындығы 7 шақырымнан аспайды. Осы 7 шақырымдық трассаны салуға облыс әкімінің сөзімен айтсақ, 74 миллард теңге жұмсалған. Ал тиісті басқарманың басшысы 531 шақырым (!) жолды жөндеуге 30 миллиард теңге сұрап жүр.

Алматы облысындағы автомобиль жолдарының ұзындығы  – 8960 шақырым. Оның 2822-і республикалық, 6138-і облыстық маңызға ие.


Оқи отырыңыз: Алматы облысында 35 шақырым жол 2 жыл бойы жасалып келе жатыр



Мақала авторы:

Ербол Ілияс

Пікір қалдыру

Пікір жазу үшін сайтқа кіріп, телефон нөмірін растаңыз.

Ұқсас жаңалықтар