ҚТЖ-ға 170 миллиард не үшін қажет?

Мадияр Жалғасұлы - 10.12.20192963

Жуырда "Қазақстан темір жолы" АҚ-на Зейнетақы қорынан 170 млрд.теңге аударылатыны баспасөз беттерінде жария болды. Ал Қазақстанда темір жол бекеттерінің жағдайы оңып тұрмағанын ескерсек, жолаушылар тасымалынан түсетін қаражаттан бөлек, осынша мол қаржы ҚТЖ-ға не себепті қажет екені түсініксіз.


Облыстардағы темір жол бекеттерінде басқасын айтпағанда әжетханаға кіру үшін де ақы төлейтінін халық жақсы біледі. Маңғыстау өңірінде онсыз да карьерлер дауынан арыла алмай отырған Шетпе елді мекенінде бір емес, екі темір жол вокзалы бар. Бірақ тұрғындар вокзал деп ауыз бармайтынын айтып отыр. Себебі вокзал ғимаратының тозығы жетіп, ешқандай қызмет түрі көрсетілмейді екен. Шетпе вокзалы жолаушылар тасымалында маңызды бекет, Жаңаөзен қаласы мен Жетібай кентінің халқы аталған вокзалға барып жолға шығады.


Тұрғындардың шағымынан соң Мемлекеттік қызмет және сыбайлас жемқорлыққа қарсы іс-қимыл агенттігі облыстық филиалының мониторинг тобы қос вокзалға барып тексеріс жүргізген. Жергілікті билік өкілдері 20 жылға жуық уақыт бойы жырға айналған темір жол бекеттерінің мәселесін бір-біріне сілтеп отыр. Халық вокзалды сенімгерлік басқару арқылы кәсіпкерлерге беру - ең тиімді жол деп отыр.

«Вокзалдарды барып көрдік. Адам шошырлық хәлде. Ішкі есіктерін былай қойғанда, сыртқы есігінің өзі жабылмайды. Терезелері сынған, төбесі ашық қалған. Мал қора деп атауға болатын шығар.Тексерістен соң вокзалға жөндеу жұмыстары басталған екен. Ғимаратты сырлап, бірнәрселер жасап жатыр. Бірақ әлі де бұл мәселе талқыланатын болады», -  дейді мониторинг тобының мүшесі Римма УТЕСБАЕВА.


Фотоларды автор ұсынды.

Мақала авторы:

Мадияр Жалғасұлы

Пікір қалдыру

Пікір жазу үшін сайтқа кіріп, телефон нөмірін растаңыз.