Жымқырылған 500 млн теңге: Кім отставкаға кетеді?

Есдәулет Қызырбекұлы - 10.01.20202232

Солтүстік Қазақстан облысы қаржы басқармасы басшысының орынбасары аса ірі көлемде қаржы жымқыру ісі бойынша күдікке ілікті.

Облыстық жемқорлыққа қарсы іс-қимылдар агенттігінің басшысы Ернар Баянғазиннің сөзінше, бюджеттен 500 миллион теңге жымқырылған.

«Қаржыға байланысты айтатын болсам, мәселе жарты миллиард теңге төңірегінде болуда. Қазір аталмыш қаржы бюджетке қайтарылды. Күдіктілердің аты-жөнін әзірге айта алмаймыз. Іс сотқа жіберілді», - деді Баянғазин.

Баянғазиннің айтуынша, егер күдіктілердің қылмысы дәлелденетін болса, онда басқарма басшылары 10 күн ішінде өз еркімен отставкаға кетуі керек.

Естеріңізге салайық, қараша айында президент Қасым-Жомарт Тоқаев өзгертулер мен толықтырулар енгізілген «мемлекеттік қызметкерлер және жемқорлықпен күрес» жөніндегі заңға қол қойған. Жаңа заң бойынша, бұдан былай басшылық қызметте отырған шенді қарамағындағы адам жемқорлық бабымен ұсталып, істі болатын болса, автоматты түрде отставкаға кетуі тиіс.

Фото: Әлеуметтік желіден.

Мақала авторы:

Есдәулет Қызырбекұлы

Пікір қалдыру

Пікір жазу үшін сайтқа кіріп, телефон нөмірін растаңыз.