Әкімдік алдында жалғыз адамдық пикет өткізген белсендіні полиция алып кетті

Дерек көзі: www.azattyq.org - 14.02.2020199

14 ақпанда түс кезінде бейбіт митинг өткізуге рұқсат беруді талап етіп, Алматы қаласы әкімдігінің алдында жалғыз адамдық пикетке шыққан Асхат Жексебаевты полиция ұстап әкетті деп хабарлады оқиға орнынан Азаттық тілшісі. Оны Бостандық аудандық полиция басқармасына алып кеткен.

Асхат Жексебаевты ұстап бара жатқан полиция қызметкерлері. 14 ақпан 2020 жыл.
Асхат Жексебаевты ұстап бара жатқан полиция қызметкерлері. 14 ақпан 2020 жыл.

Ұсталмай тұрып Асхат Жексебаев Азаттық тілшісіне өзінің митинг өткізуге рұқсат сұрап, төртінші рет өтініш беріп отырғанын, бұған дейін ешқайсысына рұқсат берілмегенін айтты. Конституцияда көрсетілген пікір айту құқығының бұзылып жатқанын жеткізді.

Ол бір адамдық пикеттерге шығып жүрген азаматтық белсенділерді де босатуды талап етті. Асхат Жексебаевтың айтуынша, 13 ақпанда сот Алматыда жалғыз адамдық пикет өткізіп жүрген белсенді Дархан Уәлиевті 15 күнге қамаған. (Sud.kz сайтындағы дерекке сәйкес, Дархан Уәлиев 11-қаңтарда "Сергек" камераларына қарсы наразылыққа қатысқаны үшін қамалған - ред.).

Жарты сағатқа созылған пикет кезінде әкімдіктен ешкім шыққан жоқ. Есесіне полиция қызметкерлері жылдам келіп, белсендіні ұстап алып кетті.

Оны полицияның нақты қай бөліміне жеткізгені белгісіз. Бостандық аудандық полиция қызметкерлерінің бірі оны Темирязев көшесіндегі бөлімшеге алып кеткен болуы мүмкін деді. Сол бөлімге хабарласқан кезде кезекші қызметкер Олжас Әзілқожаев Асхат Жексебаев есімді азаматтың әзірге жеткізілмегенін айтты.

Асхат Жексебаев - саяси тұтқындарды босатуды талап етіп және Қазақстандағы Қытай жобаларына қарсылық білдіріп, бірнеше рет жалғыз адамдық пикетке шыққан белсенді. Ол "бейбіт жиын өткізу тәртібін бұзғаны" үшін бұған дейін бірнеше рет әкімшілік жазаға тартылған.

Қарай отырыңыз: 11 күннен бері "саяси тұтқындарды" босатуды талап етіп жүрген белсенді (Қазан айы, 2019 жыл).

11 күннен бері "саяси тұтқындарды" босатуды талап етіп жүрген белсенді
please wait

No media source currently available

0:00 0:01:23 0:00

1995 жылы қабылданған "Қазақстанда бейбіт жиналыстар, митингілер, шерулер, пикеттер және демонстрациялар ұйымдастыру мен өткізу тәртібі туралы" заң бойынша қандай да бір наразылық шарасына өткізгісі келетіндер жергілікті биліктен арнайы рұқсат алуы тиіс. Рұқсатсыз жиындар "заңсыз" деп танылып, оған қатысқандар әкімшілік жауапқа тартылады.

Халықаралық құқық қорғау ұйымдары Қазақстанның "Бейбіт жиын өткізу" туралы заңы халықаралық стандартқа сәйкес емес деп жиі сынайды. Құқық қорғаушылардың пікірінше, митинг өткізу үшін жергілікті биліктен рұқсат сұрап, тек арнайы белгіленген орындарда ғана шеру өткізуге мүмкіндік беретін қазіргі заң азаматтардың бейбіт жиын өткізу құқығын шектейді.

Құқық қорғаушылар жақында үкімет ұсынған бейбіт митинг туралы заң жобасында азаматтардың конституциялық бостандықтарын пайдалану құқығын шектейтін бұрыннан келе жатқан ережелер барын айтып, мәселеге алаңдайды.

Оқи отырыңыз: Митинг өткізу құқығы. Жаңа заң жобасындағы ескі шектеулер

P. S. 14 ақпанда кешке Алматы әкімшілік сотының Асхат Жексебаевты 15 тәулікке қамағаны белгілі болды. Бұл ақпаратты Азаттыққа белсенді Қанат Жақыпов хабарлады.

Мақала авторы:

www.azattyq.org

Пікір қалдыру

Пікір жазу үшін сайтқа кіріп, телефон нөмірін растаңыз.