«Тұрмысты түзейді»

    Қазақ үкіметке емес, Қытай идеологиясына сеніп жүр

Қарлығаш Зарыққанқызы

17.09.2020, 03:10

1393

        Соңғы кездері  жұрттың барлығы баюға, ауқатты болуға құштар болды.  Осы көштен  қазақ та қалмай, «ақша шақыратын» түрлі әдіс-тәсілдерге жүгініп әлек. Баратындары түрлі тренингтер, кучингтер, семинарлар. Бұдан бөлек, Қытайдың фэн-шуй әдісі. Осы әдіс арқылы «байлық пен бақытқа қол жеткіземіз» деген қазақтар бұл күні шаңырағына Қытайдың құрбақа мен шаян ойыншықтарын тасып, үйлерінің маңдайшасына қызыл мата іліп, мес қарын мүсіндер жинап, шала бүлінуде.

                               Біреудің қаңсығы бізге таңсық

     Жалпы, мұндай наным жетегіндегі адамдар жиһаздарының өзін «фэн–шуй» әдісімен орналастырып, «Ас бөлме және фэн-шуй», «Балалар бөлмесі және  фэн-шуй», «Қонақ бөлме және фэн-шуй» әдісіне жүгінуге кеңес береді. Олардың пәлсапасы: «бақыт пен байлық үйдің бұрыш-бұрышын мекендейді, сондықтан үйдің бұрыштарын дүние-мүлікпен жаппай, ол бұрыштарға мыстан жасалған кішкене мес қарын мүсіндерді қойған абзал» дегенге саяды.

Бірақ деректерге жүгінсек, біз байлық шақырудың символы деп, төрімізге шығарып жүрген сол мес қарын мүсіндер Қытай императоры Гао Дидоның көңіл көтеретін ойыншығы болған екен. Біздің бұл сөзімізді тарих ғылымының PhD докторы Жандос Өмірбаев растап отыр.

    – Мен Қытайдың Сиянь қаласында алты ай бойы білімімді жетілдірдім. Сонда аңғарғаным,  біз «байлық шақырады» деп қатты сенетін, төрімізге немесе теледидар алдына қоятын мыстан жасалған мес қарын мүсіндер Қытай императоры Гаоның сайқымазақ ойыншығы болған. Кезінде ол өзінің ұсталарына оңашада көңіл көтеретін ойыншық жасауды тапсырған екен. Міне, бұл мүсіндердің тарихы Гао Дидоның кезеңінен басталған. Бұдан соң, кей адамдар «байлық шақырады» деген желеумен үйлерінің сыртына, көліктеріне қызыл мата байлап қояды. Көліктеріне жол ашады деп, құрбақа, құмырсқа, шаяндарды іліп қоятындарды көріп жүрміз. Қытай елінің мемлекеттік туының түсі – қызыл. Ал бақа-шаянды қытай халқы ұлттық тағамдары ретінде тұтынады. Осындайда біз мұндай ырым-тыйымдарды ұстану  арқылы Қытай идеологиясын насихаттап жатқанымызды сезбейміз.  Бұл да сананы ақырындап улаудың бір түрі, – дейді ғалым.

  

              Төрді мүсінге ұсындық, домбырамызды ысырдық

         Мамандардың пайымдауынша, Қытай бір ғана «фэн-шуй» әдісінің насихатын күшейту арқылы ойыншықтарының өтімділігін де арттырып отырған көрінеді. Экономика ғылымының докторы, профессор Жаңабай Алдабергеновтің айтуынша, бұл әдіске қазір бүкіл әлем ден қоюда.

    – Баюға, бақытты болуға ықпал етеді дейтін бұл әдіске қазір әлем халқының 80 пайызы жүгінеді. Байыптағанға, бір ғана осы әдістің насихатын күшейту арқылы Қытай елі ойыншық индустриясының өтімділігін арттырып отыр. Аңғарғанға, өзге елдің ұстанған наным-сеніміне иек арту біздің ұлттық құндылықтарымыздың парқын түсіреді. Осы арқылы өзге елдің идеологиясы санамызға мысқалдап еніп жатыр. Қытай императорының ойыншығын төрімізге шығарғанша, қазақтың төрінде неге қамшы, ер-тоқым, домбыра, шапан ілулі тұрмайды?!

      Қазір ұялы телефоннан бас алмайтын, шапшаң ойлайтын, еліктегіш ұрпақ өсіп келеді. Кейінгі буын мен орта буын арасында байланыс жоқ. Мен шапанды төріме ілемін десем, менің ұрпағым оны жақтырмайды. Мен несібені Алладан сұраймын десем, балам ақша шақыратын гүлдерді, мүсіндерді үйге жинап, әлек болады. Бұл нақты мысал. Сондықтан бұл арада көкірек көзімізді ашып, өзіміздің ұлттық құндылықтарымызды дәріптеуге мән беретін кез жеткенін ескергеніміз абзал, – дейдіэкономист-ғалым Жаңабай Алдабергенов.

      

                  Ұлттық идеология неге ақсады?

      Шынымен де кезінде қазақтар ақшалы болу үшін қандай да бір ырымдарға аса сенбеген. Қазақтың кең пейілі мен қонақжайлығы, дархандығы мен жомарттығы үйіне өзінен-өзі несібе кіргізіп отырған. Қазақ жауын ықтырып, досына жаман-жақсыны ұқтырып, жарына адалдықтың не екенін сезіндіріп отыруы үшін төріне қамшы ілген. Қазақ баласы ер-тоқымын босағаға тастамаған. Бесікті шаңырағының төріне іліп қойған. «Ырысым кетеді» деп, бағып отырған малын теппеген, ақты төкпеген. Қазір керісінше, жаңа туған сәбиді бесікке бөлеуді денсаулығына зиян деп, бесіктен жеріндік, балаларымыз қамшыны көрсе үркіп қашады. Өйткені оның қасиетін кешегі абыздарша бүгінгі ұрпаққа ұғындыратын адам тапшы. Ер-тоқым дегеннің не екенін білмейтін, оның киесін ұқпайтын ұрпақ өсіп келеді. Ал бұрынғы қазақтың кең пейілі, дархан қабағын қазір іздеп жүріп әрең табамыз. Бүгінде идеологияның ақсап жатқанының негізгі себебі –  қазіргі қазақ дағдарысқа орай, жанбағыс іздеп, бала-шағаны асыраудың қамымен әлек.

       «Барометр» талдау орталығыныңқаржыгері Жасұлан Мақсұтовтың айтуынша, қазір дала қазағы да, қала қазағы да жанбағыстың қамымен әбігер.

    – Қазір жұрттың көпшілігі «мынау байлық шақырады» деп бір зат ұсынсаң, соған сеніп қалады. Қытайдың мүсіні, доллар шақыратын гүл, қызыл мата, қытай әдісі арқылы шырақ жағып, ақша шақыру сияқты дүниелер қазаққа тән дархан, кең пейілді қасиеттерімізді жуып-шайып, болмысымызды жоғалтып жатқаны жасырын емес. Былай қарағанда түкке тұрмайтын дүние болып көрінгенімен, мұның астарында идеология жатыр. Сондықтан бізге халықтың жағдайын жеңілдетуге ықпал еткен жөн. Ол үшін елдегі бай-манаптарға бақылау орнату қажет. Бұл ретте, оларға мүлкін жариялау туралы шараны жүзеге асыру жарияланып, аяқсыз қалып барады. Осы шараны тереңдету керек. «Бизнестің әлеуметтік жауапкершілігі» деген жап-жақсы жоба басталып еді, ол да аяқсыз қалды.

       Біздің үкімет  жыл сайын үстемеақыны көбейте береді. Зейнетақы мен жәрдемақыны көбейте бергеннен түк өнбейді. Бұл құбылыс, керісінше, елдегі қымбатшылықты арттырып отыр. Әлеуметтік төлемдер өскен сайын, саудагерлер азық-түлік бағасын қымбаттата қояды. Сондықтан бұл бағытты өзгертіп, жәрдемақыны өсіргеннен гөрі халықты жалақысы жоғары жұмыспен қамту мәселесін шешкен жөн. Ол үшін, әрине, отандық өндіріс орындарын ашу, шағын бизнесті қолдау жағы жетілуі керек. Сонда халықтың төленбей жатқан несиесі төленіп, дастарханы молайып, қалтасы толыға түседі. Бұдан соң, жұртшылық жаңағыдай сананы улайтын ырым-тыйымдарға бас қатырмайды. Сондай-ақ мемлекеттік идеология мықты болу керек. Ұлттық идеологияны нықтағанымыз жөн. Олай етпесек, біреудің қаңсығы біреуге таңсық болып, халық адасып, аласұрып кетеді. Ал мұндай үрдіс тек халықты адастырғысы келетін пиғылдағы алауыздар үшін ғана тиімді, – дейді Жасұлан Мақсұтов.

Тегтер:

ҰҚСАС ЖАҢАЛЫҚТАР

Қарлығаш Зарыққанқызы 17:05
Оқушының үндеуіне министрліктегілер жауап берді (видео)
Айжан БҮРКІТБАЕВА 16:52
Қазақстанда қылмыстың 12%-ын әйелдер жасайды
Сайт әкімшілігі 11:09
Қабырғасы қақыраған құрылыстан қашан құтыламыз?
Сайт әкімшілігі 10:54
Алматы "сары" аймаққа кірді - Сағынтаев
Бифат ЕЛТАЕВА 27.11.2020, 16:22
Атыраудағы зейнеткердің жанайқайы: емхана емдемейді, әкімдік тыңдамайды
Сайт әкімшілігі 27.11.2020, 11:31
Жексенбі күні қоғамдық көліктердің жүрмейтіні мәлім болды

Аңдатпа


  • Қабырғасы қақыраған құрылыстан қашан құтыламыз?
    11:09
  • Қазақстанда қылмыстың 12%-ын әйелдер жасайды
    16:52
  • 30 пайыз: «Шымбұлақ» жаңа маусымды карантиндік шектеулермен бастады
    13:30
  • Солтүстік Қазақстанда бүтін бір ауыл қар суын ерітіп ішіп отыр (видео)
    27.11.2020, 09:35
  • Жастарға жол бермей жатқан ешкім жоқ
    27.11.2020, 09:16