Белсенді Әсия Төлесова изоляторға қамалды. Оған "Билік өкілін қорлау" бабы бойынша іс қозғалды

08.06.2020, 21:54

27

Белсенді Әсия Төлесова Алматыдағы уақытша тергеу изоляторына қамалып, үстінен іс қозғалды. Бұл туралы оның анасы Жанар Жандосова Facebook парақшасында жазды.

ІІМ тиесілі polisia.kz сайты Төлесованың қамалғанын растап, оның үстінен «Билік өкілін қорлау» және «Билік өкiлiнің қызметтік міндеттерін орындағаны үшін одан кек алу мақсатында өмiрiне не денсаулығына қауiпті емес күш қолдану не күш қолдану қатерін төндіру» бабы (378, 380) бойынша іс қозғалғанын хабарлады.

Бұл баптар бойынша, ең ауыр жаза — 3000 АЕК айыппұл салу не сол мөлшерде түзеу жұмыстарына я 800 сағатқа дейінгі мерзімге қоғамдық жұмысқа тарту не 3 жылға дейін бас бостандығын шектеуге не бас бостандығынан айыру.

Төлесованың жақындары мен белсенділер бүгін, 8 маусымда желіде оны полицияға куәгер ретінде шақыртқаны туралы қағазды жариялаған.

«Шақырту бойынша полицияға барғанда, алып қалған. Жанында адвокаты болса да, қамауды кейінге қалдыруға мүмкіндік болмады» деді Жандосова Vlast.kz сайтына.

Осыған дейін желіде Төлесованың жанында тұрған полицияның бетінен жұдырықпен ұрған сәті көрінген видео тараған еді. Бұл оқиға 6 маусым, елде билікке қарсы наразылық кезінде түсірілген.

Сенбідегі митинг кезінде полиция алаңға келген наразыларды ұстап, қарсылық шарасына кедергі жасады. Азаттық тілшілері, белсенділер және құқық қорғаушылар 6 маусымдағы митингіде кем деген алты қалада жүзден астам ұсталғанын көрген. Бірақ ІІМ бұл наразылықта тек 53 адамның ұсталғанын хабарлады.

Бір-бірін сынап жүрген тіркелмеген екі оппозициялық топ — шетелде тұратын оппозициялық саясаткер Мұхтар Әблязов басқаратын "Қазақстанның демократиялық таңдауы" қозғалысы (Қазақстан соты «экстремистік» деп танып, қызметіне тыйым салған, ал Еуропарламент «бейбіт оппозициялық ұйым» деп атаған) мен «Демократиялық партия» құру жөніндегі бастамашыл топтың жетекшісі, оппозициялық саясаткер Жанболат Мамай жұртты 6 маусымда билікке қарсы митингіге шақырған еді. Митингіге келгендер несиеге жаппай амнистия жасауды, саяси тұтқындарды босатуды, жерді шетелдіктерге сатпауды әрі жалға бермеуді талап етті.

Қамауға алынған белсенді Төлесова былтыр Қазақстан билігі кезектен тыс президент сайлауын жариялаған тұста, Алматы марафоны кезінде жас белсенділермен «Шындықтан қашып құтылмайсың. Әділ сайлау үшін» деген плакат іліп, 15 күнге қамалып шыққан. Ол Almaty Urban Air ұйымының да белсендісі. Төлесова бұған дейін де бірнеше рет қарсылық шараларына қатысып, бір адамдық пикеттер өткізген.

Тегтер:

ҰҚСАС ЖАҢАЛЫҚТАР

Аңдатпа


  • Үгіт-насихат материалдарын "Жас Алашқа" ұсыну тәртібі туралы мағлұмат
    23.11.2020, 18:42
  • Семинарға сенбеңіз, қаржылық сауаттылық туралы оқытқан алаяқ ұсталды
    23.11.2020, 10:49
  • Ауыз шаюға арналған сұйықтық коронавирусты емдей ме?
    23.11.2020, 09:56
  • "Көлігім жоқ болса да қарыз төледім" - салық органдарына шағымданатындар көп
    21.11.2020, 11:05
  • Билбордтардан не пайда, жемқорлар саны азаймаса?
    21.11.2020, 10:52