«Мен жылаудан шаршадым»: Яна Легкодимова мен оны өлтірді деп айыпталған адамның хаттары сотта оқылды

Тыңдалым барысында марқұм қыз бен күдіктілердің бірі арасындағы хат алмасу дауыстап оқылды. Бұл туралы «Ақ Жайық» басылымы хабарлады.

Хаттар бірнеше сағат бойы оқылды

Хабарлама жазбалары қыркүйек айының соңына, яғни Яна қаза тапқаннан бір айға жетпейтін уақыт бұрын жазылған.

Басында олардың әңгімесі жылы, мейірімге толы болса, уақыт өте келе суықтық, қызғаныш пен шаршау байқалады.

«Маған сен қажетсің. Қандай болсаң да қабылдаймын, құрметтеймін. Жұмыстан кейін кездесейік пе?», - деп жазған Яна.

«Не үшін?» - деп жауап беріпті жігіт.

«Ауа райы жақсы ғой. Серуендегің келмей ме?», - дейді Яна.

«Қазір — жоқ», - дейді күдікті.

Қыз байланысын сақтап қалуға тырысқан, ал ол алыстай түскен.

«Мені себепсіз ашуландырма. Мен бәрін айтамын. Менен келіспеушілік іздеме. Сен мені елемейсің. Мен жылаудан шаршадым. Мен енді жалғыз жыламаймын!», - деп жазған Яна.

«Қорқытқаның өзіңе пайда әкелмейді. Сен тек басқа адамға ауыртпалық саласың. Мен тасжүрекпін», - деп жауап берген ер адам.

Кейін Яна: «Келші, өтінем», - деп жазған. Ол болса тек «Ок» деп қысқа жауап берген.

«Біз жай ғана кездесіп, бір-бірімізбен уақыт өткізсек те жеткілікті. Бұл махаббат емес — бұл қорқынышты нәрсе», - деп жазған күдікті.

Алғашқы махаббат пен соңғы үміт

Яна өз сезімін сақтап қалуға тырысқан:

«Мен сенің өміріңнің бір бөлігі болғым келді. Егер бәрі осылай аяқталатынын білсем де, бәрібір осы жолдан қайта өтетін едім», - дейді Яна.

Кейінірек әңгімелері қоштасу бағытында өрбіген:

«Мен жай ғана қоңырау шалдым, неге ашуланасың? Бұрын да істерің көп болатын, бірақ елемейтін едің. Өтінемін, бәрін аяқта, мені жібер. Қайта оралмас үшін. Құшақтасып қоштасайық. Менен ғана емес, басқа адамдардан да бас тарт. Мен үндемей, азап шектіріп отырмын. Егер жақсы көрсең, талап етпе, қорқытпа», - деп жазған Яна.

«Сен мені қорқытумен ұстай алмайсың. Мен кеткім келеді. Мен ақымақпын, бірақ басқа адамға жолама», - деп жауап берген ол.

Сотта айтылғандай, Легкодимова күдіктінің тағы бір қызбен байланысы барын біліп қойған. Ер адам тіпті сол қыздың атын атамауын талап етіп, оны «басқа адам» деп атаған.

Марқұмның анасы Галина Легкодимова бұл оқиғаның қызы үшін алғашқы махаббат болғанын айтты:

«Ол бәрінен жетістікке жетсе де, бәрібір бала сияқты еді. Бұл — оның алғашқы махаббаты болатын», - деді ол.

Хаттар оқылып жатқанда айыпталушы бейқам күйде отырған.

Тергеу дерегінше, Яна 2024 жылдың 18 қазанында Атырауда үйінен шығып, бір танысының қоңырауынан кейін оралмаған. Соңғы рет ол сол танысының көлігінде көрінген. Кейін із-түзсіз жоғалған.

Анасы іссапардан оралып, қыздың заттарын тауып, полицияға хабарлаған. Тергеу барысында тәртіп сақшылары Янаның күнделігін тапқан, онда Р. есімді адам аталған.

Көп ұзамай 24 жастағы Р. және 25 жастағы сыбайласы К. ұсталды.

Янаның денесі тек 8 айдан кейін, 2025 жылдың 20 маусымында табылды.