Зеленский: «Украина өз мақсатына жетеді – Еуропалық Одаққа мүшелікке ешкім кедергі бола алмайды»

Бұл туралы ол Данияның Орхус қаласында сөйлеген сөзінде айтты. Зеленскийдің бұл мәлімдемесі Венгрияның Украина мен ЕО арасындағы мүшелік келіссөздерге вето қойған тұста жасалды.

«Біз бұл жолдан таймаймыз. Украина – Еуропаның бір бөлшегі, және бұл жолда бар күш-жігерімізді саламыз. Бізге тек басқа елдердегі серіктестердің саяси ерік-жігері мен қолдауы қажет», - деді Зеленский.

Зеленскиймен бірге сөз сөйлеген Данияның премьер-министрі Метте Фредериксен Украинаның еуропалық болашағына сенімді екенін және ЕО төрағалығы кезінде Венгрияға барынша қысым көрсететінін мәлімдеді.

«Украина – Еуропа отбасының толыққанды мүшесі, болашақта НАТО-ның да мүшесі болады», – деді ол.

Сонымен қатар Фредериксен Еуроодақтың Украинаға қолдау көрсету тәсілін қайта қарау керектігін алға тартты. Оның айтуынша, Украина тек өз мемлекетін ғана емес, бүкіл Еуропаның қауіпсіздігін қорғап отыр.

«Қару-жарақ жеткізуді қайырымдылық деп емес, Еуропаның өз қауіпсіздігін қамтамасыз етудің бір бөлігі ретінде қарауымыз керек», - деді ол.

Еуропалық комиссия төрайымы Урсула фон дер Ляйен де Украинаға нақты қолдау көрсетуге шақырды. Ол елдерді Security Action for Europe (SAFE) бағдарламасы аясында Украинаға тікелей қаржы бөлуге үндеді. Аталған бағдарлама шеңберінде 150 миллиард еуро қарастырылып отыр. Бұл қаржы Украинаға қару-жарақ сатып алып беруге немесе оның қорғаныс өнеркәсібіне инвестиция салуға бағытталмақ.

Зеленский АҚШ-тың Украинаға қару жеткізуін уақытша тоқтатуына байланысты жуырда Трамппен сөйлесетінін айтты. Ал Метте Фредериксен Вашингтоннан қолдаудың жалғасатынына үміт білдіріп, қажет болған жағдайда Еуроодақ Украинаға қолдауды өзі де жалғастыруға дайын екенін жеткізді.

Айта кету керек, қазіргі таңда Украина мен Еуроодақ арасындағы мүшелік келіссөздер Венгрияның қарсылығына тап болды. Будапешт бұған дейін де Киевке қарсы бағытталған қадамдарымен танылып келеді. Дегенмен, еуропалық елдердің көпшілігі Киевті қолдап, Украинаға одаққа мүше болу жолында толық қолдау көрсетуге дайын екенін аңғартып отыр.

Украина үшін Еуроодаққа қосылу – тек сыртқы саясаттағы мақсат емес, елдің болашағын айқындайтын стратегиялық бағыт. Киев бұл жолда күресті жалғастырып, әрбір кедергіні еңсеруге ниетті. Зеленский мен еуропалық көшбасшылардың ортақ ұстанымы – Украина Еуропаның ажырамас бөлігі екенін мойындау.