Қазақстанда 800 мың бас киік атылуы мүмкін – Экология министрі

Министрдің айтуынша, ғалымдар киік санын реттеу мақсатында олардың 20 пайызын қысқартуды ұсынған.

— Біз 1-2 күн ішінде өз шешімімізді жариялаймыз. Ғалымдар ұсынған негіздемеге сәйкес, бүкіл популяцияның 20 пайызы реттеуге жатады. Көктемгі санақ қорытындысы бойынша елімізде жалпы саны 3 миллион 900 мың киік бар, оның ішінде 2 миллион 300 мыңы — Орал популяциясы, 1 миллион 600 мыңы — Бетпақдала популяциясы, ал 700–800 мыңдай шағын популяция — Үстіртте, - деді Экология министрі Үкіметте өткен баспасөз мәслихатында.

Экология министрі келтірген деректерге сәйкес, Қазақстандағы киіктердің саны шамамен 3,9 миллионға жеткен. Соның ішінде 800 мыңға жуығы реттеу мақсатында аулануы ықтимал.

— Онда жыныстық-жас ерекшелігі бойынша құрамы да анықталған: 40 пайызы — аталық киіктер, 40 пайызы — аналық, 20 пайызы — биылғы төлдер (лақтар) болуы керек. Яғни, бізде нақты сандар мен параметрлер бар, қазір сол бойынша дайындық жүргізіліп жатыр, - деді Нысанбаев.

Министр сондай-ақ, мұндай көлемді жүзеге асыру үшін ет комбинаттарының көмегі қажет болатынын айтты.

Еске салайық, мамыр айының соңында Экология министрлігі киік популяциясын реттеу бойынша жол картасын әзірлеуді аяқтағаны белгілі болды. Вице-министр Нұркен Шәбиевтің айтуынша, тек ет комбинаттары өңдеуге дайын мөлшерде ғана киік еті алынады. Бұл шешім бұған дейінгі жылдардағыдай еттің бүлініп кетуін болдырмау үшін қабылданып отыр.