Жазылу
«Самұрық-Қазына» тізбегімен байланысқан алаяқтық схемасы әшкере болды: сот жүріп жатыр
Іс бойынша пара мен ондаған миллион теңгенің ұрлығы қаралуда.
Атырауда «Самұрық-Қазына» ұлттық әл-ауқат қорының еншілес ұйымы — «Karabatan Utility Solutions» ЖШС-нің басшыларына қатысты атышулы сыбайлас жемқорлық ісі сотта қаралып жатыр.
«Karabatan Utility Solutions» ЖШС — Атырау облысындағы «Ұлттық индустриялық мұнай-химия технопаркі» арнайы экономикалық аймағында газтурбиналық электр станциясының құрылысын жүзеге асыратын жобаның операторы.
Іс материалдарына сүйенсек, бұл — күрделі әрі көпдеңгейлі ұрлық пен парақорлық схемасы.
Айыпталушылар қатарында:
- Бақытжан Қалдыбаев — «Karabatan Utility Solutions» ЖШС басқарма төрағасының экономика және қаржы жөніндегі орынбасары.
- Женісбек Лұқпанов — басқарма төрағасының өндіріс жөніндегі орынбасары.
- Асхат Дүйсенғалиев — «Атырау жылу желілері» АҚ-ның вице-президенті (ресми лауазымы солай көрсетілген).
- Саламат Жанғалиев — «БатысҚұрылысИнвест» ЖШС басшысы.
- Тимур Бисембаев — жеке кәсіпкер. Сарапшылардың айтуынша, бұрын-соңды аты белгісіз болғанымен, бұл істе маңызды рөл атқарған тұлға.
Бесеуіне де ауыр сыбайлас жемқорлық қылмыстары бойынша айып тағылып отыр.
Тергеу нұсқасы бойынша, топ-менеджерлер мен олармен байланысы бар компаниялар бюджет қаржысын жымқыру үшін бірнеше деңгейлі алаяқтық схема ұйымдастырған. Ақша бір күндік фирмалармен жалған келісімшарттар арқылы ұрланған.
Мемлекетке келтірілген залал — 63 миллион теңгеден астам.
Процестің нәтижесі:
- Қалдыбаев, Жанғалиев және Бисембаев қамауға алынды;
- Дүйсенғалиев үйқамаққа жіберілді;
- Лұқпанов кепілмен босатылды.
Айта кетейік, 2024 жылдың тамызында «Самұрық-Қазынаның» тағы бір еншілес ұйымы — QazaqGaz компаниясында да миллиардтаған қаражатты кеңсе жалдау арқылы жымқыру фактілері әшкере болған еді. Сондай-ақ, жуырда бұрынғы вице-министр Қожағапанов та миллиардтаған теңгені ұрлау ісі бойынша 3 жылға сотталған болатын.
