Магомедов 100 миллиард рубльдік мұнай кешенін қалай иемденді?

ФСБ мен Бас прокуратура және ІІМ бірігіп жүргізген тергеу нәтижесінде Солтүстік Кавказдағы ең ірі федералдық мұнай тасымалдау кешені – “Дагнефтепродукт” пен жаңадан салынған “Дагнотех” мұнай өңдеу зауыты мемлекет меншігіне қайтарылды. Бұл екі нысанның жалпы құны 100 миллиард рубльден асады. Сонымен қатар Магомедов пен басқа да күдіктілердің заңсыз жолмен алған 3 миллиард рубльден астам мүлкіне тыйым салынды.

Қалай жымқырды?

ФСБ-ның дерегінше, Магомедов 1991–2005 жылдары “Дагнефтепродукттың” бас директоры болған. Ол кезде кәсіпорын мемлекет меншігінде еді. 2005 жылы компания жекешелендіріліп, Магомедов оның басшылығында 2010 жылға дейін қалған. Кейін жекешелендірілген кәсіпорын негізінде “Каспетролсервис” құрылып, ол қазіргі таңда “МСБ-Холдинг” құрамына енген.

Тергеу мәліметінше, 2001–2005 жылдары Магомедов әкімшілік ресурсты пайдаланып, Дағыстан билігінен заңсыз шешімдер қабылдатуға қол жеткізген. Соның нәтижесінде федералдық меншік болып саналатын кәсіпорын республикалық меншікке заңсыз аударылып, кейін оның бақылауындағы тұлғаларға төмен бағамен сатылған.

Тергеу барысы:

– Генпрокуратура Магомедовке қарсы сыбайлас жемқорлыққа байланысты азаматтық талап-арыз түсірген.

– Сот арызды қанағаттандырып, мүліктерді мемлекетке қайтаруға шешім шығарды.

– Магомедов пен оның айналасына қатысты алаяқтық және қылмыстық табысты заңдастыру баптары бойынша қылмыстық іс қозғалды.

– Тергеу аясында 70-тен астам тінту жүргізіліп, құнды заттар мен ірі көлемдегі қаржы тәркіленді.

ФСБ мәліметінше, Магомедов қызметінен сенімнен айырылғаны үшін босатылған, тергеу әрекеттері әлі де жалғасып жатыр. Махачкала қалалық соты Ресей Бас прокуратурасының Магомедовке қарсы сыбайлас жемқорлыққа қатысты арызын қанағаттандырды. Іс қарау кезінде Магомедов пен оның туыстары сот шешіміне қарсылық білдірмеген. Дегенмен, ол қамауға алынбаған, қазіргі уақытта елден шығуға тыйым салынған күйі бостандықта жүр. Бұл оқиға Ресейде жоғары лауазымды шенеуніктердің мемлекет меншігін жеке пайдасына асырып, көлеңкелі жолмен байып келгенін көрсететін кезекті ірі жемқорлық ісі ретінде бағалануда.

ФСБ бұл схема арқылы Магомедов шамамен 20 жыл бойы аталған активтерді заңсыз иемденіп келгенін айтады.

Ресейлік БАҚ-тың жазуынша, Магомедов ұзақ жылдар бойы мемлекеттік қызметті көлеңкелі бизнестен түскен табыспен ұштастырып, шын мәнінде долларлы миллиардер болған. Қазір оған қатысты аса ірі көлемде алаяқтық жасау және қылмыстық жолмен алынған табысты заңдастыру баптары бойынша қылмыстық іс қозғалған. Бұл баптар бойынша оған 7 жылдан 10 жылға дейін бас бостандығынан айыру жазасы қарастырылған.