Шерзат ісі бойынша сотталғандардың жақындары Тоқаевтан көмек сұрады

Олар аталған қылмыстық іс біржақты қаралды деп есептейді және жәбірленуші тараптың да жауапқа тартылуын сұрайды.

Ата-аналардың айтуынша, сот тек бір тараптың мүддесін қорғаған. Айыпталушылардың барлығы сотталғанымен, марқұмның отбасы мен олардың жақындарының тарапынан да арандатушылық әрекеттер болғанын мәлімдеді.

“Марқұмның туыстары әлеуметтік желілер арқылы халықты кері пікірге итермеледі, эмоциямен манипуляция жасап, тіпті тыйым салынған психологиялық тәсілдерге жүгінді”, – дейді үндеуде.

Сонымен қатар олардың айтуынша, Қаржаубай есімді азамат полицейлерді пышақпен қорқытып, көлікке зақым келтірген. Ал оның қарындасы тәртіп сақшыларының бірін күрекпен ұрған. Тағы бір туысы – Бақыт Реймова көпшілікті тәртіпсіздікке шақырып, тіпті ел Президентін балағаттағаны айтылды.

“Біз баламыздың тағдырына немқұрайлы қарамаймыз. Әділет бәріне бірдей болуы керек. Құзырлы органдар бұл деректерге назар аударады деп сенеміз”, – дейді ата-аналар.

Қазіргі таңда бұл үндеу қоғамда түрлі пікір туғызып жатыр. Мұндай мәлімдемелер қосымша тергеуге, тіпті істің қайта қаралуына түрткі болуы мүмкін.