Қазақстандық 16 миллион азаматтың жеке деректері желіге тарап кетті

SecuriXy.kz Telegram-арнасының мәліметінше, интернетте 15,8 миллион ЖСН, 17 миллион телефон нөмірі, сондай-ақ азаматтардың мекенжайлары мен өзге де жеке ақпараты ашық қолжетімді болып кетті.

Таратылған деректер 799 мегабайттық архивке жинақталған. Оның ішінде азаматтардың аты-жөні, жынысы, туған күні, азаматтығы және тіпті ұйымдардың атауы да бар — олардың қатарында стоматологиялардан бастап мемлекеттік мекемелерге дейін кездеседі.

Кестеде мынадай бағандар бар: Тегі, Аты, Әкесінің аты, Жынысы, Туған күні, Идентификатор, ЖСН, Ұялы телефон, Жұмыс телефоны, Үй телефоны, Азаматтығы, Ұлты, Мекенжайы, Мекенжай расталған ба, Тұру басталған және аяқталған күні.

Былтыр шілдеде Кибершабуылдарды талдау және зерттеу орталығы Қазақстан азаматтарының жеке деректері тағы да тарап кеткенін айтқан. Орталық Telegram мессенджерінде қолданушы BreachForums атты хакерлер форумындағы деректің бәрін желіге жария еткенін мәлімдеген.

Олардың қатарынан Spark атты көлік-логистика компаниясының деректері, Шәкәрім университеті студенттері мен талапкерлерінің дерегі, 2022 жылғы 24 маусымдағы B2B 2GIS Қазақстан мәліметтері, Yandex Food пен 2021 жылғы Fonbet-тің Қазақстан мен Ресейдегі пайдаланушыларының деректері табылған.

Мамандардың айтуынша, мұндай ауқымды ақпараттың таралуына себеп — жартылай ашық мемлекеттік сервистердің API-ін пайдалану, қауіпсіздігі төмен онлайн-платформалардың бұзылуы немесе интеграциялық жүйелер арқылы кездейсоқ экспорт болуы мүмкін. Ең сорақысы — бұл деректер өзекті: мәліметтердің басым бөлігі 2022 жылға тиесілі, алайда архивте 2023–2024 жылдарға қатысты ақпарат та бар. Бұл фишинг, әлеуметтік инженерия, құжаттарды қолдан жасау, алаяқтық қоңыраулар сияқты қауіптер туындатуы мүмкін.

Егер өзіңіз туралы деректер тарап кеткеніне күмәндансаңыз: eGov, мобильді банктер, салық жүйелеріндегі белсенділікті тексеріңіз.