Иран ядролық қарудан бас тарта ма?

Бұл туралы елдің сыртқы істер министрінің міндетін атқарушы Аббас Арагчи мәлімдеді. Оның айтуынша, Иран халықаралық алаңда өзінің бейбіт мақсаттағы ядролық бағдарламасын қорғауға мүдделі, бірақ бұл бағытта әділетті және тең құқылы келісім қажет.

— Біз Иранның ядролық қаруға ие болуына жол бермеуге бағытталған кез келген келіссөзге дайынбыз. Алайда, егер бұл келісімнің мақсаты — Иранды заңды ядролық құқығынан толық айыру болса, онда біз бұған келісе алмаймыз, - деді Арагчи.

Оның бұл мәлімдемесі Mehr ақпарат агенттігінің Telegram-арнасында жарияланған бейнежазбада айтылды.

Министрдің айтуынша, Иран ядролық келіссөздердің алтыншы раунды аясында АҚШ тарапына нақты ұсыныстар жолдауды жоспарлап отырған. Алайда Таяу Шығыстағы ахуалдың ушығуы бұл жоспарларға кедергі келтіріп отыр.

13 маусымға қараған түні Израиль Иран аумағына ауқымды әуе шабуылын ұйымдастырып, 100-ден аса нысанаға 330-ға жуық оқ-дәрі тастаған. Шабуыл салдарынан Иранның Ислам революциясы Сақшылар корпусының жоғары лауазымды қолбасшысы Хоссейн Салами, Бас штаб бастығы Мохаммад Багери және бірнеше ядролық ғалым қаза тапты. Жараланғандар саны — 95 адам. Бұл жағдайдан кейін Иран мен Израиль өзара соққы алмасуға көшті.

Арагчи Израильдің агрессиясы дипломатиялық диалогқа үлкен кедергі келтіретінін атап өтті. Оның айтуынша, Иран тек қорғаныс мақсатында әрекет етуде және Израиль соққыларын тоқтатса, Тегеран да қарулы жауап беруді доғаруға дайын.

— Егер АҚШ шынымен де бейбітшілікке мүдделі болса, алдымен Израильдің әрекетін ашық айыптауы керек, - деді министр.

АҚШ президенті Дональд Трамп болса, бұл жағдайға байланысты түсініктеме беріп, Америка Иран тарапынан нақты қауіп төнсе ғана қарсы соққы беруге дайын екенін айтты. Сонымен қатар, ол Израильдің Иранға шабуылдарын қолдамайтынын, бірақ оған бөгет қоя алмайтынын жеткізді.

Қазір ядролық келісімге қатысты келіссөздер тоқтап тұр. Жағдайдың одан әрі дамуы Иран мен Израиль арасындағы қақтығыстың қаншалықты ұзаққа созылатынына байланысты болады.