Солтүстік Еуропа елдері Ресейден төнетін қауіп туралы ескертуде

Бұл туралы Дания премьер-министрі Метте Фредериксен: «Демалыс күндері болған қорқынышты шабуылдар біз бұрыннан-ақ біліп отырған нәрсені дәлелдеп отыр: Ресей бейбітшілікке мүдделі емес», – деп мәлімдеді.

«Күндіз Ресей президенті (Владимир Путин) келіссөздер туралы айтады, ал түнде Украинаға бомба жаудырады. Украинаға бұрынғыдан да көп қолдау қажет», – деді ол Финляндияда Солтүстік Еуропа елдерінің әріптестерімен кездесуден кейін.

Ұқсас пікірді Финляндия премьер-министрі Петтери Орпо да білдірді. Оның айтуынша,
«Ресей – Финляндияға және бүкіл Еуропаға ұзақ мерзімді қауіп төндіретін ел».
Ол бұл қауіп тек әскери салада емес, кибершабуылдар мен Балтық теңізінің түбінде байланыс кабельдерінің бірнеше рет зақымдануы сияқты жағдайлармен де байланысты екенін атап өтті.

Орпо Ресей президенті Владимир Путинге қысымды күшейтіп, оны Украинадағы атысты тоқтату туралы келіссөздерге конструктивті түрде қатысуға мәжбүрлеу қажеттігін айтты:
«Күш қолданбай, Путин шешім іздемейді. Сондықтан бізге көбірек қысым қажет», – деді ол.

Норвегия премьер-министрі Йонас Гар Стёре де Ресейдің Украинамен бітімге келуге әзір екеніне ешқандай белгі жоқ екенін айтты: «Менің үмітім – бұл АҚШ-тың нақты ұстаным қабылдауына және белсенді қысым көрсетуіне түрткі болады, олар шеттеп қалмауы тиіс», – деді ол.

Саммит Финляндияның оңтүстік-батысындағы Турку қаласында өтті. Оған Финляндия, Швеция, Норвегия, Дания және Исландия үкіметтерінің басшылары қатысты. Кейін Германия канцлері Фридрих Мерц те саммитке қосылып, үкімет басшыларымен бірлескен кешкі асқа қатысты.

«Әдетте Германияның жаңа канцлері алғашқы сапарларының бірін Финляндияға жасамайды», – деп жазады dpa агенттігі. «Бірақ Солтүстік Еуропа елдерінің саммиті оған Германияның НАТО бойынша серіктесі саналатын бес елдің үкімет басшыларымен бірден танысуға мүмкіндік беріп отыр».

Саммитке Гренландия премьер-министрі Йенс-Фредерик Нильсен де қатысты. Соңғы айларда АҚШ президенті Дональд Трамп бірнеше рет Гренландияны бақылауға алғысы келетінін білдірген болатын. Нильсен бұл талаптарды үзілді-кесілді жоққа шығарды және Солтүстік Еуропа елдерінің басшыларына көрсеткен қолдауы үшін алғыс білдірді.