Израиль Йемен астанасы Санаға жаңа әуе соққысын жасады

“Аль-Масира” телеарнасының хабарлауынша, жарылыстар президент сарайы, астаналық хатшылық, мемлекеттік мұнай компаниясы орналасқан ғимараттарда, сондай-ақ жанармай қоймалары мен электр станцияларына жақын аумақтарда тіркелген. Қала орталығы, оңтүстік және оңтүстік-батыс бөлігі қатты зардап шеккен. Куәгерлердің айтуынша, ондаған жарылыс пен өрт шыққан. Оқиға орнына жедел жәрдем көліктері жетіп, алғашқы медициналық көмек көрсетілуде. Дәрігерлер қаза тапқандар мен жараланғандар барын айтады, бірақ ресми мәлімет әлі жарияланған жоқ.

Израильдің қорғаныс министрі Исраэль Кац әуе соққысын растады, алайда егжей-тегжейлі ақпарат бермеді. Израильдің әскери радиосы бұл операцияның аяқталғанын мәлімдеп, нысана ретінде президент сарайы, жанармай қоймалары мен электр станциялары таңдалғанын хабарлады.

Айта кетейік, бұған дейін Израиль Йеменнің Ходейда портына да соққы берген болатын. Сарапшылар бұл шабуылдарды хуситтердің Израиль аумағына жасаған дрон және зымыран шабуылдарына жауап ретінде бағалап отыр.

Хуситтер болса, Израильдің қысымына қарамастан Газа секторына қолдауын тоқтатпайтынын мәлімдеп келеді.

Израиль жағының мәлімдеуінше, бұл порт хуситтердің Ираннан қару-жарақ пен әскери техника жеткізуіне және өзге де террористік әрекеттеріне пайдаланылып отыр. Ал Баджилдегі цемент зауыты қозғалыстың негізгі экономикалық тіректерінің бірі саналып, туннельдер қазу мен әскери инфрақұрылым тұрғызуға қолданылып жатқан көрінеді.