Литва үкіметі премьер-министрдің отставкасына байланысты тарайды

Бұл туралы үкіметтің ресми хабарламасында айтылды.

«Мүмкін, бұл сәл драмалық естілер, бірақ мен отставкаға кетемін, ал сіздер жаңа премьер шешім қабылдағанға дейін уақытша жұмыс істей бересіздер», - деді Палуцкас министрлерге қарата сөйлеген сөзінде. Ол әріптестеріне «аз жұмыс атқарған жоқсыңдар» деп алғысын білдірді.

Палуцкас бүгін өз отставкасы туралы Литва президенті Гитанас Науседаға ресми түрде хабарлайтынын айтты. Конституцияға сәйкес, үкімет президенттің жарлығынан кейін ресми түрде отставкаға кеткен болып есептеледі.

Elta агенттігінің хабарлауынша, уақытша үкімет басшысы қызметін қаржы министрі Римантас Шаджюс атқарады. Президент Науседа премьер отставкаға кеткеннен кейін 15 күн ішінде жаңа кандидатураны ұсынып, оны сейм (парламент) мақұлдауы тиіс.

Палуцкас өзіне және отбасына қатысы бар компанияларға байланысты тергеу аясында қызметінен кетті. 24 шілде күні президент Науседа оған екі апта уақыт беріп, не түсініктеме беруін, не қызметтен кетуін талап еткен. Ертеңінде Палуцкас еңбек демалысына кетіп, «араларға қамқорлық жасауым керек» деп мәлімдеген.

31 шілдеде президент Науседа Палуцкастың өзіне хабарласып, үкімет басшылығынан және Социал-демократиялық партия жетекшілігінен кететінін айтқанын жеткізді. Партияны уақытша Йонава мэрі Миндаугас Синкявичюс басқарады. LRT мәліметінше, ол үкімет басшысы қызметіне басты үміткерлердің бірі болып отыр.