Жазылу
Қанды Қаңтарда ата-анасынан айырылған балаларға грант бөлінді
«Қазақстан халқына» қоры жаңа оқу жылы қарсаңында әлеуметтік осал топтағы жастардың жоғары білім алуына қолдау көрсетпек.
Қор 2025 оқу жылына 500 білім грантын бөліп отыр. Бұл туралы Ғылым және жоғары білім министрлігі мәлімдеді.
"2025-2026 оқу жылында "Қазақстан халқына" қоғамдық қоры "Қазақстан халқына" ҚҚ Білім беру гранттары" қайырымдылық бағдарламасы аясында талапкерлерге жоғары оқу орындарында оқуға 500 білім беру грантын бөлді", - деп жазылған хабарламада.
Грант иегері атану мүмкіндігіне келесі санаттағы талапкерлер ие:
- ауылдық, шағын немесе моноқалаларда тұратын, табысы төмен отбасылардың балалары;
- жетім балалар немесе кәмелет жасына толғанға дейін ата-анасының қамқорлығынсыз қалғандар;
- мүмкіндігі шектеулі азаматтар;
- ерекше қажеттілігі бар баланы тәрбиелеп отырған отбасылардың балалары;
- 2022 жылғы Қаңтар оқиғасы кезінде қаза тапқан азаматтардың балалары;
- сол оқиғалар кезінде жарақат алған балалар.
Қордың бұл бастамасы — елдегі әлеуметтік әділеттілікті нығайту мен қайғылы оқиғалардан зардап шеккен отбасыларға қолдау білдірудің бір көрінісі.
Айта кетейік, мемлекеттік білім гранты иегерлерінің тізімі 10 тамызға дейін жарияланады.
