Путин мен Трамп не туралы сөйлесті?

Телефон арқылы өткен әңгіменің соңында Ресей президенті Владимир Путин журналистерге шығып, сөйлесудің егжей-тегжейімен бөлісті. Оның айтуынша, екі саясаткердің әңгімесі екі сағатқа жуық уақытқа созылып, ашық әрі мазмұнды болған.

– Әңгіме өте мазмұнды әрі ашық өтті. Мен Дональд Трампқа Мәскеу мен Киев арасындағы тікелей келіссөздерді қайта бастауға қолдау білдіргені үшін алғыс айттым, - деді Путин.

Сөйлесу барысында Дональд Трамп Украинадағы қақтығысты тоқтату мәселесін көтеріп, атысты тоқтату бойынша өз ұстанымын білдірген. Ол бейбітшілікке қол жеткізудің маңызын атап өтіп, тараптарды келіссөздерге шақыру қажет екенін жеткізген.

Өз кезегінде Владимир Путин Украинамен атысты тоқтату тиісті келісімдер мен шарттарға қол жеткізілген жағдайда ғана мүмкін екенін айтты. Оның айтуынша, Ресей атысты тоқтату мәселесін де қамтитын жан-жақты меморандум әзірлеуге дайын екенін білдірген.

– Біз бұл бағытта ілгерілеуге дайынбыз. Алайда қарулы қақтығысты тоқтату тиісті келісімдерге қол жеткізілгенде ғана мүмкін болады. Барлық тарапты қанағаттандыратын ымыралы шешімдер табу қажет, - деді Путин.

Сөйлесу барысында екі тарап халықаралық қауіпсіздік, экономикалық санкциялар және стратегиялық тұрақтылық сияқты басқа да өзекті тақырыптарды қозғаған. Сарапшылар мұны алдағы уақытта АҚШ пен Ресей арасындағы ықтимал диалогтың бастамасы ретінде қарастырып отыр.

Телефон арқылы сөйлесіп болған соң, Трамп ұзақ жазба қалдырды.

«Путинмен жаңа ғана сөйлесіп болдым. Меніңше, әңгіме өте жақсы өтті. Ресей мен Украина дереу атысты тоқтату және одан да маңыздысы — соғысты толығымен тоқтату жөніндегі келіссөздерді бастайды. Келісім шарттары екі тараптың өзара келісімімен анықталады — бұл солай болуы тиіс, өйткені тек солар ғана келіссөз үдерісінің егжей-тегжейін біледі, ол өзгелерге қолжетімсіз.

Әңгіме барысында тон мен рух өте жақсы болды. Егер олай болмағанында, мен оны қазірдің өзінде ашық айтатын едім, кейінге қалдырмас едім.

Ресей бұл апатты «қанды қырғын» аяқталған соң АҚШ-пен кең ауқымды САУДА қатынастарын дамытқысы келеді және мен бұл идеяны толық қолдаймын. Ресейде жұмыс орындарын ашу мен әл-ауқатты арттыруға зор мүмкіндік бар. Оның әлеуеті — ШЕКСІЗ. Украина да өз елін қалпына келтіру барысында сауда қарым-қатынастарының үлкен пайдасын көре алады.

Ресей мен Украина арасындағы келіссөздер дереу басталады. Мен бұл туралы Украина Президенті Владимир Зеленскийге, Еуропа комиссиясының Президенті Урсула фон дер Ляйенге, Франция Президенті Эммануэль Макронға, Италия Премьер-министрі Джорджа Мелониге, Германия Канцлері Фридрих Мерцке және Финляндия Президенті Александр Стуббқа Путинмен сөйлескен соң бірден телефон арқылы хабарладым.

Папа Римскийдің айтуынша, Ватикан бұл келіссөздердің өз аумағында өтуіне зор қызығушылық танытып отыр.

Процесс басталсын!» – деп жазды Трамп.