Парижде Anorbank иесі, өзбекстандық банкир Кахрамонжон Олимов ұрланып, соққыға жығылды

Өзбекстандық Anorbank банкісінің иесі Кахрамонжон Олимов Парижде ұрлаудың құрбаны болды. Оны ұрып-соғып, өліммен қорқытқан. Кейін ол кепіл төлемі берілгеннен кейін босатылған.

Оқиға 23 маусымда болған. Олимов Францияға іскер серіктестерімен келіссөздер жүргізу үшін келген. Ол Париждің орталығында ұрланып, Ницца қаласындағы вилланың жертөлесіне жеткізілген.

Le Monde басылымына берген сұхбатында Олимовтың жеке көмекшісі бұл жағдайды «ауыр сынақ» деп атап, бірақ бәрі артта қалғанын жеткізді. 

Олимовтың айтуынша, оны үш сағат бойы ұрып-соққан, тіпті дарға асу көрінісін инсценировка жасаған. Ұрлаушылардың бірі шешен ұлтының өкілі болуы мүмкін — себебі оның орыс тіліндегі акценті ерекше болған. Олар Олимовты 10 миллион доллар берешегі бар деп айыптаған.

Банкир тергеу кезінде физикалық және психологиялық тұрғыда шаршағанын, тамақ ішпегенін және өзін өте нашар сезінгенін айтқан.

Қылмыскерлердің бірі биткоин арқылы жасалған аударымдарды және Олимовтың Еуропадағы инвестициялық жобаларын білгенін көрсеткен. Бұл жобалар қатарына Германиядағы қонақүйлер мен Anorbank банкі ішіндегі операциялар да кіреді.

Le Monde мәліметінше, Олимов ұрлаушылармен келісіп, 5 миллион доллар төлеуге келіскен. Ол алдын ала 200 мың долларды Ташкенттегі делдал арқылы жіберген. Осыдан кейін банкир босатылып, Парижге оралған соң полицияға арызданған. Шілде айының басында Франция полициясы ұрлауға қатысы бар деген күдікпен Түркия азаматын ұстады.

Қазіргі таңда Кахрамонжон Олимов Ташкентке оралған. Аудармашысының айтуынша, ол өзін жеке күзетпен қамтамасыз еткен.

Anorbank басшылығы Францияда банктің акционерімен болған оқиғаға қатысты мәлімдеме жасады.

«Бұл оқиға жеке сипатқа ие және банктің қызметіне қатысы жоқ. Anorbank штаттық режимде жұмысын жалғастыруда – барлық бөлімшелер, қызметтер мен цифрлық арналар тұрақты қызмет көрсетіп жатыр. Жоба жоспарлары бекітілген кестеге сай орындалуда», - делінген хабарламада.

Кахрамонжон Олимов – Anorbank цифрлық банкінің 99,38% акциясының иесі. Банк 2020 жылы құрылған. Олимовтың басқаруындағы активтер көлемі 1 миллиард доллардан асады.

Нидерландта тіркелген компания арқылы ол Өзбекстанның Сурхандария облысында француздық EDF компаниясымен бірлесіп газ турбиналы электр станциясының құрылысын жүргізіп жатыр.

Сондай-ақ ол бірнеше компанияда үлеске ие:

• Milliy To‘lov Tizimlari (Hamyon төлем сервисі),
• Clever Mikromoliya Tashkiloti (микроқаржы ұйымы),
• Distri For Country (төлем жинау және кредиттік бюро қызметі),
• Anor Assets (қаржылық лизинг),
• Dynamic Energy (жылу электр станцияларынан энергия өндіру).

2023 жылы Олимовтың Француз супермаркеттер желісін Өзбекстанға енгізетін bi1 компаниясының тең құрылтайшысы екені хабарланған.