«Мені тірідей көміп жатыр»: Газада кепілге алынғандардың жанайқайы

Әлеуметтік желілерде тараған бейнематериалдарда кепілге алынған Ром Браславски мен Эвьятар Давид атты екі жас жігіт азық-түлік пен су тапшылығынан азап шегіп жатқанын көруге болады. Браславски камера алдында көз жасын тыя алмай, күніне небәрі үш кішкентай фалафель жегенін айтса, Давид өзін «қабір қазуға» мәжбүр болғанын жеткізді. Ол бұл жағдайды “тірідей көмілгенмен тең” деп сипаттады.

Осы оқиғалардан кейін әлемдік көшбасшылар ХАМАС-тың әрекетін қатаң сынға алды. Ұлыбританияның сыртқы істер министрлігі бейнеконтентті «адам сенгісіз, жан түршігерлік насихат» деп атады. Германия мен Франция да ХАМАС-ты халықаралық гуманитарлық нормаларды өрескел бұзды деп айыптады. Франция президенті Эммануэль Макрон кепілдерді босату — атысты тоқтату туралы кез келген келісімнің басты шарты екенін қадап айтты. Израиль премьер-министрі Биньямин Нетаньяху Қызыл Крестке шұғыл түрде гуманитарлық көмек — азық-түлік пен дәрі-дәрмек жеткізуге араласу қажеттігін мәлімдеді. Ал ХАМАС тарапы гуманитарлық көмектің тек әуе шабуылдары тоқтап, дәліздер ашылған жағдайда ғана жеткізілуіне келісетінін жеткізді.

Қазіргі уақытта Газа аумағында кепілде отырғандардың ресми саны – 49 адам. Израиль тарапы олардың 27-сін тірі емес деп санайды. Бұл көрсеткіштің өзі халықаралық ұйымдар арасында үлкен алаңдаушылық туғызып отыр. БҰҰ мен Қызыл Крест өкілдері жағдайды «ең ауыр гуманитарлық дағдарыс сценарийінің бірі» деп бағалауда.

Сонымен қатар Израильдің өз ішінде кейбір саясаткерлер мен ақпарат құралдары кепілдердің аштықта отырғанын жоққа шығарып, бұл видеоларды «ХАМАС-тың жалған ақпараты» деп сипаттады. Дегенмен, әлемдік қауымдастық бұл мәлімдемелерге күмәнмен қарап, Тель-Авивке жағдайды ашық жариялау және кепілдерге көмек көрсету үшін қысымды арттыра түсуде.

Өткен демалыста Тель-Авивте жүздеген адам наразылық акциясына шығып, үкіметтен кепілдерді босату үшін шешімді әрекеттер күтетінін жеткізді. Браславски мен Давидтің отбасылары митинг кезінде: “Олардың бәрі тозақтан шығарылуы тиіс – дәл қазір!” деп мәлімдеді.

БҰҰ-ның қолдауымен жұмыс істейтін агенттіктер Газада ашаршылықтың ең ауыр сценарийі орындалып жатқанын хабарлады. Соғыс басталғалы бері Газа денсаулық сақтау министрлігі 175 адамның аштықтан қаза тапқанын, олардың 93-і – балалар екенін мәлімдеді. БҰҰ мен кейбір Батыс елдері бұл ашаршылыққа Израильдің гуманитарлық көмек жеткізуге кедергі келтіруін кінәлап отыр. Израиль бұл айыптауларды теріске шығарып, бар кінәні ХАМАС-қа артады.

Газа соғысы жалғасқан сайын, халықаралық сахнада Израильге деген қарсылық күшейіп келеді.