Жеңіс шыңында қалып қойған ресейлік альпинист әйел қаза тапты

Қырғызстан ТЖМ баспасөз қызметі Наталья Наговицынаның қаза болғаны жөніндегі ақпаратты растады. Сарапшылар тобы да бұл болжамды бірауыздан қолдаған.

Сонымен қатар оған көмек көрсетуге тырысқан италиялық альпинистің денесі де табылғаны хабарланды. Ол шамамен 6900 метрде көз жұмған, денесі әлі сол жерде. Құтқарушылар 6100 метр биіктікке дейін көтерілгенімен, Наговицынаның денесі 7140 метрде жатыр. Ауа райының күрт нашарлауына байланысты құтқару жұмыстары тоқтатылды.

Әзірге альпинистің денесі көктемге дейін тауда қалады. Ал оның шатырын іздеу жұмыстары тек 2026 жылдан ерте басталмайды.

Еске сала кетейік, Наталья Наговицына 12 тамызда Жеңіс шыңында қалып қойған болатын. Бұған дейін, төрт жыл бұрын оның жұбайы да Хан-Тәңірі шыңында қаза тауып, денесі сол жерде қалған еді.

20 тамыз кешкісін Shot арнасы Наговицына қаза тапқан болуы мүмкін екенін жазды. Алайда бұл ақпаратты әзірге ресми растау немесе жоққа шығару мүмкін емес, себебі оған жету өте қиын. Тау басында температура –23°C шамасында.

Mash арнасының дерегінше, шетелдік екі альпинист Натальяны төмен түсірмек болған, бірақ боран мен жауған қардың кесірінен жоспарлары сәтсіз аяқталған. Олар оған ұйықтауға арналған қапшық, тамақ, газ баллон және оттық қалдырып кеткен.