Германия Қожамжаровтың «командасындағы» экс-прокурорды Қазақстанға экстрадициялаудан бас тартты

Неміс соты Дүйсеновке қатысты қылмыстық қудалау саяси уәждермен қозғалуы мүмкін деген қорытындыға келген. Осыған байланысты ол босатылып, Қазақстанның экстрадициялау жөніндегі сұрауы ресми түрде тоқтатылған.

Бұрынғы бас көлік прокуроры Алматы прокуратурасы тарапынан 29 тамызда халықаралық іздеуге жарияланған болатын.

Қазақстанда экс-прокурорға қылмыстық жолмен алынған табысты заңдастыру, алаяқтық және пара алу баптары бойынша айып тағылып отыр. Бұған дейін ол Германияда саяси баспана беру туралы өтініш түсірген.

Экстрадиция туралы сұрауға негіз болған қылмыстық іс аясында Дүйсенов 22 миллион АҚШ доллары көлемінде пара алды, сондай-ақ табысты заңдастыру мен алаяқтық жасады деп айыпталады. Қорғау тарапының мәлімдеуінше, бұл іс қоғамда үлкен резонанс туғызып, сыртқы қысыммен қатар жүрген.

Әзірге Қазақстан билігі экстрадициялау жөнінде қайта сұрау салуға әрекет жасай ма, жоқ па — ол жағы белгісіз.

Бұған дейін Мақсат Дүйсенов Қазақстанның сұрауы бойынша Интерпол арқылы Германия аумағында ұсталған. Ол елден «Хоргос ісі» деп аталған тергеу басталғаннан кейін кеткен. Бұл істе ол негізгі куәгерлердің бірі ретінде танылған. Саяси баспана сұрауы экстрадициялау рәсімін уақытша тоқтатуға мүмкіндік берген.

Дүйсенов бұрын құқық қорғау органдарын басқарған Қайрат Қожамжаровтың командасында жұмыс істеп, оның басшылығы кезеңінде бірқатар маңызды лауазымдарды атқарған. Қожамжаров Сенатқа кеткеннен кейін, Дүйсенов те мемлекеттік қызметтен кеткен.