Журналистер Перизат Қайрат ісі бойынша соттың баспасөз қызметі мен судьясына шағым түсірді

Бүгін Астана қаласындағы ауданаралық сотта сағат 11:00-де Перизат Қайрат ісі бойынша тараптардың жарыссөзі жалғасты. Сот залында 12 адам сөз сөйледі. Алайда отырыс небәрі 20 минутқа ғана созылды. Сот отырысына қатысушыларға сағат 15:00-де айыпталушылар — Перизат Қайрат пен Гайни Алашбаева сөз сөйлейтіні хабарланды. Алайда бұл кезең жабық форматта өтетіні, залға кіру шектелетіні және баспасөз орталығында трансляция болмайтыны айтылды.

Сот процесін бақылап жүрген журналистер бұл шешімге наразылық білдірді. Олардың айтуынша, мұндай тосын шектеулер объективті ақпарат алуға кедергі келтіреді әрі кәсіби міндеттерін толыққанды орындауға мүмкіндік бермейді. Көп ұзамай журналистер соттың баспасөз хатшысы мен судьяның әрекетіне байланысты Мәдениет және ақпарат министрлігіне арналған ұжымдық шағым мәтінін әзірлеп, оған көптеген БАҚ өкілдері қол қойды.

Жарыссөзден кейін журналистер сот отырысы өткен қабатқа түсіп, адвокат немесе судьядан ақпарат алу үшін күткен. Алайда есіктер жабық болған. Кейін баспасөз өкілдеріне сот процесіне қатысушылардың барлығы қызметтік есік арқылы шыққаны хабарланды.

Айта кетейік, сот процесінің басынан бастап журналистерге бірқатар кедергі келтірілді. Алдымен Zoom арқылы онлайн-трансляцияға рұқсат берілмей, оның орнына баспасөз орталығынан бір ғана монитор орнатылған тар бөлме ұсынылды. Сонымен қатар айыпталушылардың сөзін жариялауға толық тыйым салынған.

Еске салайық, 23 шілде күні Перизат Қайрат пен оның анасы Гайни Алашбаеваға қатысты резонансты істе тараптардың жарыссөзі жалғасқан болатын. Сотта жәбірленушілердің өкілдері сөз сөйледі — тергеу дерегінше, олардың саны 47 адам.