Зеленский Путинге тағы да энергетикалық бітім ұсынды

«Егер Ресей біздің энергетикалық инфрақұрылымға шабуылдарын тоқтатуға дайын болса, біз де дәл сондай жауап қадамға дайынбыз», – делінген Украина президентінің сайтында жарияланған мәлімдемеде.

Сондай-ақ Ресей бұл ұсынысты АҚШ өкілдерінен бұрын алғаны да атап өтілген.

Украина басшысы өткен түні Одессадағы энергетикалық инфрақұрылым мен тұрғын үйлерге ресейлік дрондар жасаған соққыларды еске салды. Бұл шабуыл салдарынан үш адам қаза тапқан.

«Біз Ресейге кем дегенде Пасха кезінде – жылдың осы ерекше кезеңінде – атысты тоқтатуды бірнеше рет ұсындық. Бірақ олар үшін барлық уақыт бірдей, олар үшін қасиетті ештеңе жоқ. Егер Ресей соғысты жалғастырып, оны қаржыландыра алса – бұл оның бейбітшілікке көшуге ниеті жоқ екенін білдіреді», – деді Зеленский.

 Ол сондай-ақ Киевтің одақтастарын Мәскеуге қысымды жалғастыруға шақырды.

30 наурыз күні Украина президенті Киевтің Пасха қарсаңында, яғни 12 сәуірде, энергетикалық бітімді талқылауға дайын екенін айтқан еді. 

Ал Кремль бұл ұсынысты қабылдамады. Дмитрий Песков мұны «нақты рәсімделген бастама көрмедік» деп түсіндірген.