Шымкентте 13 миллион теңге ұрлаған бухгалтерге үкім шықты

Шымкент қаласында №43 мектептің бас бухгалтері Айдана Мекемтас бюджет қаражатын жымқырғаны үшін екі жылға бас бостандығынан айырылды. 27 жастағы бұрынғы қызметкер 13 миллион теңгеден астам қаржыны заңсыз иемденгені үшін сот алдында жауап берді.

Сот материалдарына сәйкес, Мекемтас 2022 жылдың қаңтарынан 2024 жылдың тамызына дейін мектептің электронды цифрлық қолтаңбасын пайдаланып, 15 мұғалімнің жалақысын негізсіз арттырып отырған. Кейін «техникалық қате болды» деген сылтаумен артық төленген соманы өзінің жеке шотына қайтаруды талап еткен.

Сонымен қатар ол мектепке арналған тауарларды сатып алуға бөлінген қаржыны жеке кәсіпкердің шотына аударып, артынан бұл қаражатты жеке мақсаттарына пайдаланған. Мемлекетке келген шығын көлемі 13 миллион теңгеден асқан.

Айыпталушы сот барысында өз кінәсін толық мойындап, ақшаны тұрмыстық қажеттіліктеріне жұмсағанын айтып, залалды толықтай өтеген. Осыны ескерген сот жазаны жеңілдететін мән-жай ретінде қарады.

Шымкент қалалық соты Айдана Мекемтасты ҚР Қылмыстық кодексінің 189-бабы 3-бөлігі 1 және 2-тармақтары бойынша (“Қызмет бабын пайдалана отырып, сеніп тапсырылған мүлікті иемдену немесе ысырап ету”) кінәлі деп таныды. Сот үкіміне сәйкес, ол екі жылға бас бостандығынан айырылды және өмір бойына мемлекеттік және квазимемлекеттік мекемелерде қызмет ету құқығынан айырылды.

Шымкент қалалық білім басқармасы жәбірленуші тарап ретінде танылып, үкім заңды күшіне енді. Айдана Мекемтас сот залында қамауға алынып, жазасын қауіпсіздігі ең төмен мекемеде өтейтін болды.

Бұл іс мемлекеттік қаржыны бақылау мен кадрларды іріктеудегі қатаңдықтың маңыздылығын тағы бір мәрте көрсетті.