11 жылға сотталған Талдықорғанның экс-полиция басшысы қызметтік пәтер үшін соттасып жатыр

Даудың мәні – оның отбасы 2016 жылдан бері тұрып жатқан қызметтік пәтері. Бұл туралы tengrinews.kz  жазды.

Күштібаев өкілі арқылы полиция департаментінің 2023 жылдың тамыз айынан бері баспананы жекешелендіру туралы рапортын қарамай отырған әрекетсіздігін заңсыз деп тануды сұраған.

 Баспанада сотталғанның жұбайы мен үш баласы тұрады.

Сонымен қатар, отбасы ықтимал көшіруге тыйым салуды талап еткен, алайда сот бұл өтінішті қанағаттандырмаған.

Оқиға қалай өрбіді?

Пәтер Күштібаевтың отбасына 2016 жылы коммуналдық қордан баспанаға мұқтаж ретінде берілген.

2023 жылы тұрғын үй полиция департаментінің балансына өткізілді, содан кейін қызметтік тұрғын үйді жалға алу шарты жасалды.

2023 жылғы 25 тамызда Күштібаев жекешелендіру туралы рапорт тапсырған. Құжат тіркелгенімен, 2025 жылғы қарашада талап арыз берілген сәтке дейін қаралмаған.

Кейін Күштібаев мемлекеттік қызметтің беделіне нұқсан келтіретін тәртіптік теріс қылық үшін жұмыстан босатылды.

2024 жылдың сәуірінде сот оны зорлау қылмысы бойынша кінәлі деп танып, 11 жылға бас бостандығынан айыру жазасын тағайындады. Сонымен қатар арнайы атағы мен марапаттарынан айырды.

Тараптардың ұстанымы

Экс-полицейдің өкілі сотта Күштібаевтың 35 жылдан астам қызмет еткенін, ал теріс себеппен жұмыстан босатылуы жекешелендіруден бас тартуға негіз бола алмайтынын айтты. Сондай-ақ отбасының пәтерде күрделі жөндеу жүргізгені атап өтілді.

Полиция департаменті өз кезегінде пәтердің қызметтік мәртебесі бар екенін және талапкер енді құқық қорғау органдарының қызметкері емес екенін алға тартты. Ведомствоның пікірінше, пәтер тұрғын үйге мұқтаж қазіргі қызметкерлерге берілуі тиіс.

Жетісу облысының мамандандырылған ауданаралық әкімшілік соты полиция департаментінің әрекетсіздігін заңсыз деп танып, рапортты тұрғын үй комиссиясының отырысында қарауды міндеттеді.

Алайда сот пәтердің жекешелендірілуге жататыны жөнінде түпкілікті баға берген жоқ. Шешімде комиссия тиісті шешім қабылдамайынша мұндай қорытынды жасау ерте екені көрсетілген.

Бөлек іс аясында Күштібаевтың отбасы полицияға көшіру туралы талап арыз беруге тыйым салуды сұраған.

Алайда 2025 жылдың қазанында сот бұл талапты қанағаттандырудан бас тартты.

2026 жылдың қаңтарында апелляциялық инстанция бұл шешімді өзгеріссіз қалдырды.

Айта кетейік, Күштібаев 2023 жылдың қарашасында 27 жастағы әйелді қызметтік кабинетінде зорлады деген күдікпен ұсталған.

2024 жылдың сәуірінде сот оны кінәлі деп танып, 11 жылға колонияға қамады.

Кейін жәбірленуші, оның жігіті және бұрынғы сот хатшысы да 40 миллион теңге беріп, айғақтарды өзгертуге әрекеттенген алаяқтық ісі бойынша бөлек үкім алды.

Сонымен қатар Күштібаевтың жұбайына қатысты жәбірленушіні параға көндіру фактісі бойынша қылмыстық іс тергеліп жатыр.