2025 жылдың қорытындысы: қазақстандық велоспорттағы негізгі жетістіктер мен жаңа бастамалар

2025 жылы Федерация айтарлықтай ауқымды жұмыс атқарып, ел ішінде де, халықаралық аренада да жоғары нәтижелер көрсетті. Қазақстандық велоспортшылар ірі халықаралық жарыстарда барлығы 36 медаль жеңіп алды: 14 алтын, 12 күміс және 10 қола. Малайзия мен Таиландта өткен Азия чемпионаттарында трек, шоссе және пара-велоспорт бағытындағы ұлттық құрамалар бірнеше мәрте жүлдегерлер қатарынан көрініп, Қазақстанның аймақтағы позициясын нығайтты.

Жарқын жетістіктердің бірі – Бахрейнде өткен жасөспірімдер арасындағы III Азия ойындары. Қазақстанның жас спортшылары бұл жарыста 2 алтын және 1 күміс медаль еншіледі.

Қазақстан велосипед спорты федерациясының президенті, «Атамекен» ҚР ҰКП Төралқа төрағасы Райымбек Баталов 2025 жылды соңғы уақыттардағы ең табысты маусымдардың бірі болғанын атап өтті.

«Бұл жетістіктер Қазақстанда болашақ чемпиондардың мықты буыны қалыптасып келе жатқанын дәлелдейді. Маунтинбайк, трек және шоссе бағыттарында жыл бойы еліміздің әр өңірінде 20 ұлттық чемпионат пен кубок жарыстары өтті. Шымкент, Қостанай, Тараз, Семей, Астана және Қонаев қалаларында өткен жарыстар ішкі күнтізбенің географиясын кеңейтіп, қатысушылар санын едәуір арттырды. Бұл — қазақстандық велоспорт тарихындағы ең қарқынды және мазмұнды маусымдардың бірі. Спортшыларымыз халықаралық аренада да жарқын әрі сенімді нәтижелер көрсетті», - деді Райтбек Баталов.

Федерация биыл да ауылдық жерлердегі спорт мектептерін қолдау бағдарламасын жалғастырды. Оған сәйкес ондаған балалар мен жасөспірімдер спорт мекемелері жаңа велосипед бөлшектерімен, спорттық формамен және оқу-жаттығу процесіне қажетті техникалық жабдықтармен толықты. Бұл бастама ауыл балаларына велоспортқа тең қолжетімділік беріп, жаңа таланттарды анықтауға және елдің спорттық инфрақұрылымын нығайтуға серпін берді.

Атқарылған жұмысқа Туризм және спорт вице-министрі Серік Жарасбаев та жоғары бағасын берді.

«Қазіргі таңда қазақстандық велоспорт серпінді дамудың жаңа кезеңінде тұр. Президент Үкіметке барлық жағдай жасап, саланы қолдауды күшейтуді тапсырды. Оның нақты нәтижесін бүгінде көріп отырмыз. Алдымызда үлкен міндеттер бар: келесі жылы Азия ойындары, одан кейін Олимпиадаға дайындық. Егер күш-жігерімізді біріктіріп, жүйелі дайындықты жалғастырсақ, жоғары нәтижелерге қол жеткізе алатынымызға сенімдімін. Министрлік тарапынан жан-жақты қолдау көрсетуге дайынбыз»,- деді ол.

Салтанатты іс-шараның маңызды сәттерінің бірі - «Алтын дөңгелек» атты жыл сайынғы символикалық марапатты «Жасөспірімдер» санатындағы жылдың үздік спортшысына табыстау болды. Биылғы жүлденің иегері – 2009 жылы туған, Алматы қаласының өкілі, Қазақстанның бірнеше дүркін чемпионы Глеб Новиков.

«Мен велоспортқа кездейсоқ келдім. Аулада велосипед теуіп жүргенде, болашақ бапкерімнің жұбайы байқап қалып, секцияға барып көруді ұсынды. Содан бері осы спортпен айналысып келемін. Қазір мен — шоссе жарысы бойынша Қазақстанның үш дүркін чемпионымын, маунтинбайк бойынша елдің екі дүркін чемпионымын. Велоспортсыз өмірімді елестете алмаймын. Болашақта Олимпиада чемпионы болуды армандаймын», — деді Глеб Новиков.

Басқосу барысында әйелдер командасы UAETeamADQ-мен ынтымақтастық туралы келісімге қол қойылуы ерекше назарға ие болды. Бұл бастама Қазақстандағы әйелдер велоспортының жаңа кезеңін ашып, спортшыларға халықаралық деңгейде дайындалуға, бірлескен жаттығу бағдарламаларына қатысуға және әлемнің үздік велошабандоздарымен тәжірибе алмасуға мүмкіндік береді. Сондай-ақ, бұл серіктестік 2026 жылы Жапонияда өтетін Азия ойындарына дайындықты күшейтеді.

«Қазақстанда әйелдер велоспортының дамуына үлес қосу – мен үшін үлкен қуаныш. Бүгін біз болашақтағы жеңістерге жол ашып жатырмыз: бұл жүйелі жұмыс, жаңа халықаралық мүмкіндіктер және талантты спортшыларды қолдау. Алда жақсы нәтиже мен үлкен жетістіктер күтеді деп сенемін», — БАӘ ADQ UCI WT Әйелдер велокомандасының бас директоры Яна Зель.

Іс-шараның ең ерекше кезеңі — велоспортқа алғаш қадам жасап жүрген ең кішкентай спортшыларды марапаттау рәсімі болды. Бұл дәстүр балаларды ерте жастан спортқа баулудың, белсенді өмір салтына қызығушылық қалыптастырудың маңызын көрсетеді.

Сонымен қатар жасөспірімдер арасындағы III Азия ойындарының чемпиондары да марапатталып, олардың жеңістері еліміздің дайындық жүйесінің тиімділігін және Қазақстанның халықаралық спорттық беделін күшейте түсті.

Салтанатты кештің қорытынды бөлімінде ELITE санатындағы үздік спортшылар — шоссе, трек, MTB, BMX және паравелоспорт бағыттары бойынша марапатталды. Олардың халықаралық аренадағы жетістіктері Қазақстанды қуатты және болашағы зор велоспорт елі ретінде танытуға зор үлес қосты.