Жазылу
2025 жылғы Forbes рейтингіне Қазақстаннан жеті миллардер енді
Америкалық Forbes журналы әлемдегі ең дәулетті адамдардың дәстүрлі Forbes World's Billionaires рейтингін жариялады. 2025 жылы бұл тізімге Қазақстаннан жеті миллиардер енді. Олардың арасында Вячеслав Ким, Михаил Ломтадзе, Тимур Турлов, Владимир Ким, Тимур және Динара Құлыбаевтар, сондай-ақ Булат Өтемұратов бар.
Бұл туралы Forbes.кz жазды.
Қазақстандағы ең бай миллиардер — Вячеслав Ким
Kaspi.kz компаниясының акционері әрі директорлар кеңесінің төрағасы Вячеслав Ким биыл да Қазақстандағы ең бай кәсіпкер атағын сақтап қалды. Оның байлығы 7,1 млрд доллар деп бағалануда (өткен жылы — $5,8 млрд). Ол Forbes-тің жаһандық тізімінде 464-орынға көтерілді (2024 жылы — 511-орын).
Екінші орында — Михаил Ломтадзе
Kaspi.kz серіктесі Михаил Ломтадзе 597-орынға жайғасып, Қазақстандағы бай адамдар қатарында екінші орында тұр. Оның байлығы 5,9 млрд доллар деп бағаланған (2024 жылы — $5,2 млрд, 581-орын).
Тимур Турлов – үздік үштікке кірді
Freedom Holding корпорациясының негізін қалаушы Тимур Турлов қазақстандық миллиардерлер арасында үшінші орынға көтерілді. Оның дәулеті бір жыл ішінде $3,3 млрд-тан $5,8 млрд-қа өсті. Жаһандық рейтингте ол 991-орыннан 605-орынға көтерілді.
Төртінші орында – Владимир Ким
KAZ Minerals және Қазахмыс компанияларының акционері Владимир Ким – төртінші орында. Оның байлығы $5,7 млрд деп көрсетілген (2024 жылы – $3,6 млрд). Forbes-тің жаһандық рейтингінде 620-орынды иеленді (өткен жылы — 896-орын).
Бесінші және алтыншы орын — Құлыбаевтартар
«Алмэкс» холдинг тобының жетекшісі Тимур Құлыбаев пен оның жұбайы Динара Құлыбаева тізімде қатарынан бесінші және алтыншы орындарды иеленді. Екеуінің де байлығы $5,3 млрд деп көрсетілген (өткен жылы – $5 млрд). Forbes оларды жаһандық рейтингте бірлескен 673-орынға орналастырған (өткен жылы — 612-орын).
Жетінші орында — Булат Өтемұратов
ForteBank акционері Булат Өтемұратов Қазақстандық тізімде жетінші орында. Оның байлығы $3,7 млрд-қа жеткен (2024 жылы — $2,7 млрд). Ол Forbes рейтингінде 1238-орыннан 979-орынға көтерілді.
Қазақстандық жеті миллиардердің жиынтық байлығы $38,8 млрд-ты құрады. Бұл 2024 жылғы $25,4 млрд-пен салыстырғанда едәуір өсім бар екенін көрсетеді.
Әлемдегі ең бай адам ретінде Илон Маск танылды. Tesla және SpaceX компанияларының иесі бір жыл ішінде байлығын $147 млрд-қа арттырып, $342 млрд-пен бірінші орынға шықты. Ал былтырғы көшбасшы — LVMH компаниялар тобының басшысы Бернар Арно — $178 млрд-қа дейін азайып, бесінші орынға түсіп қалды.
Марк Цукерберг екінші орынға көтеріліп, байлығы $216 млрд-қа жетті. Джефф Безос үшінші орынға жайғасып, байлығы $215 млрд деп бағаланды.
2025 жылы Forbes тізіміндегі әлемнің 20 ең бай адамының жиынтық дәулеті $2,8 трлн-ға жетті.
