300 мыңнан астам палестиналық Газа қаласынан кетті

Израиль премьер-министрі Биньямин Нетаньяху 2025 жылдың 8 қыркүйегінде Газа қаласын алу операциясының жақын арада басталатынын мәлімдеді. Бейне үндеуде ол жергілікті тұрғындарды эвакуациялауға шақырды. Содан бері адамдар үйлерін жаппай тастап кете бастады - олардың көпшілігі Газа секторының оңтүстігіне қарай бет алды.

Сонымен бірге, қала төңірегінде әскери қимылдар күшейе түсті. 14 қыркүйекте Израиль қорғаныс күштері ХАМАС пайдаланды деген үш көпқабатты үйге соққы берді. Жергілікті аурухана қызметкерлері шабуылдан кемінде 13 адамның қаза тапқанын хабарлады.

IDF есебіне сәйкес, қазірдің өзінде қаладан 300 мыңнан астам тұрғын эвакуацияланған. БҰҰ мәліметі бойынша, Газа мен оның төңірегінде бір кездері миллионға жуық адам тұратын.

Израиль армиясы кейінгі аптада Газа қаласына бес рет шабуыл жасап, 500-ден астам нысанды атқылағанын мәлімдеді. Палестина ресми деректеріне сәйкес, соңғы жексенбіде кемінде 45 бейбіт тұрғын қаза тапқан.

ХАМАС дерегінше, 11 тамыздан бері Израиль 1 600 тұрғын үйді және 13 мың шатырды қиратқан.

Гуманитарлық ұйымдар Израильдің Газа қаласын толық басып алуы азық-түлік тапшылығынан қиналып отырған халыққа қиындық әкелетінін ескертуде. Аймақтың Денсаулық сақтау министрлігінің дерегінше, аштық пен тамақ жетіспеушілігінен кемінде 422 адам көз жұмған, олардың ішінде 145 бала бар. Кейінгі екі жылға созылған соғыс барысында 64 мыңнан астам палестиналық қаза тапқан.