Адам өлтіруге күдікті қазақстандықтар Украинадағы соғысқа кеткен

Бұл туралы әлеуметтік желіде жәбірленуші тараптың адвокаты Ажар Әбділ хабарлады.

Оның айтуынша, ақша іздеу жарияланған күдіктілердің қайда екенін анықтауға және оларды ұстауға көмектесетін мәлімет берген адамға төленеді.

Александр Насибари 2025 жылғы 24 қарашада жоғалып кеткен.

Екі аптадан кейін, 8 желтоқсанда, оның мәйіті Ақтау маңындағы радон көздері орналасқан аймақтан табылған.

Сараптама қорытындысына сәйкес, оның денесінде жиырмадан астам пышақ жарақаты, сондай-ақ басынан алған жарақаттар болған.

Оқиға бойынша «Адам өлтіру» бабы бойынша қылмыстық іс қозғалған. Күдіктілер анықталып, оларға халықаралық іздеу жарияланған.

Александрдың туыстарының айтуынша, күдіктілер Эльдар Аллахвердиев пен Амир Аллахвердиев (әке мен бала) Қазақстаннан кетіп қалған. Алдын ала мәлімет бойынша, олар әуелі Ресейде болған, кейін Әзербайжан арқылы Түркияға кеткен болуы мүмкін.

Жақындарының айтуынша, полицияда оларға бұл адамдар Ресейде келісімшартқа отырып, соғыс қимылдарына қатысу үшін Украинадағы майданға жіберілген болуы мүмкін деген ақпарат айтылған.

Сондай-ақ тергеу дерегінше, адам өлтірілген күні күдіктілердің жанында үшінші ер адам болған. Ол тек екі аптадан кейін мәйіт табылған жерді көрсеткен.

Оған қатысты «Қылмысты жасыру» бабы бойынша қылмыстық іс қозғалған.

Қазіргі уақытта Эльдар мен Амир Аллахвердиевтерге халықаралық іздеу жарияланған.