Әділет министрлігі Orda.kz бас редакторының адвокатын лицензиясынан айыруды талап етіп, сотқа жүгінді

 Бұл туралы бірқатар қазақстандық БАҚ, соның ішінде Азаттық радиосы хабарлады.

Министрліктің мәліметінше, 5 қаңтар күні Мұрат Адамға лицензиясынан айыру туралы талап-арыз ресми түрде табысталған. Іс 14 қаңтар күні сағат 11:30-да Алматы қаласының Бостандық аудандық сотында қаралады.

Аталған талап-арызды Алматы қалалық Әділет департаменті министрліктің тапсырмасымен 29 желтоқсанда берген. Негіз ретінде ішкі істер органдарының ұсынысы алынған. Әділет министрлігі «Власть» басылымының сұрауына берген жауабында адвокаттың әлеуметтік желілерде сот алды тергеу барысына қатысты «бірнеше рет жалған ақпарат таратқанын» мәлімдеді.

«Ведомствоаралық тергеу-жедел тобының материалдарына сәйкес, адвокат қылмыстық іске қатыса бастаған сәттен бері Orda.kz интернет-басылымының бас редакторына қатысты тергеу туралы шындыққа сәйкес келмейтін мәліметтерді жариялаған», – делінген министрлік жауабында.

Министрлік өкілдері бұл әрекеттерді Қазақстан заңнамасы мен адвокаттардың кәсіби этика кодексін өрескел бұзу деп бағалады. Сондай-ақ, адвокаттық қызмет лицензия арқылы ғана жүзеге асатыны еске салынды.

Адвокаттың жауабы

Мұрат Адам министрлік айыптауларымен келіспейтінін айтып, әлеуметтік желідегі парақшасында мәлімдеме жасады. Оның сөзінше, ол жалған ақпарат таратпаған.

«Менің қорғауымдағы тұлға – Гүлнара Бажкенова. Ол не себепті әділет органдары менің оның құқықтарын бұздым деп өз бетінше шешім қабылдайтынын және неге оның пікірі ескерілмейтінін түсінбей отыр. Ол өз қорғаушысын таңдауға заңды түрде құқылы», - деді адвокат.

Orda.kz ісі

Еске салайық, 1 желтоқсанда Алматыда құқық қорғау органдары Orda.kz редакциясында тінту жүргізді. Редакция өкілдерінің айтуынша, тергеу тобы құжаттарды, техниканы және жалақыға арналған қаражатты алып кеткен, сейф ашылған. Сол күні тінту бас редактор Гүлнара Бажкенованың пәтерінде де өткен.

Мұрат Адам ол кезде өзіне редакцияға да, Бажкенованың үйіне де кіргізілмегенін, тінтуге санкция көрсетілмегенін айтып, мұны қылмыстық-процестік заңнаманың бұзылуы деп бағалаған.

Сол күні сот Гүлнара Бажкенованы «жалған ақпаратты қасақана және бірнеше рет таратты» деген айыппен екі айға үйқамаққа алу туралы шешім шығарды.

Желтоқсан айының ортасында Orda.kz ісін атап өткен тоғыз құқық қорғау ұйымынан тұратын коалиция Қазақстан билігі тәуелсіз журналистер мен медиаға қысымды күшейтті деп мәлімдеген. Ал ресми Астана бұл пікірмен келіспей, құқық қорғаушылар «жағдайды дұрыс түсінбегенін» айтты.