Аида Балаева: Театрлар өмірден өткен тұлғаларды шығарып салатын орынға айналып бара жатыр

Министр кейінгі жылдары еліміздегі мәдениет ошақ­тары, оның ішінде театрлар өмірден өткен тұлғаларды шығарып салатын орынға айналып бара жатқандай әсер қалдыратынын айтты. Бұл ойды Қазақстан Жазушылар одағы да еске­руін сұрады.

«Бұрын Алматы қаласы әкімдігінде қыз­­мет етіп жүрген кезімде он күннің ішін­де бірнеше танымал тұлға өмірден өтті. Сол кезде театр жетекшісі Талғат ­Те­менов қоңырау шалып, актерлер күн­­діз – қоштасу рәсімінде, кешке – спек­такльде жүретінін, бәрінің көңіл күйі, еңсесі түсіп кеткенін айтты. «Қастерлі ор­да жер­леу бюросына айналып кеткен жоқ па?» де­ген қынжылысын білдірді. Бұл әңгіме әлі күн­ге дейін есімде. Шынында да, біз шығармашылық адамдардың моральдық-психологиялық жағдайын ескермейтін секілдіміз. Екіншіден, кеңестік кезеңнен қалған дәстүрлерді сол қалпында бүгінге дейін жалғастыра беру қаншалықты дұрыс?!», - деді А.Балаева.

Министр өнер мен әдебиетке еңбегі сіңген жандардың есімі ұмыт қалмауы керек екенін атап өтті. Алайда олардың рухын ұлықтау мен қоштасу рәсімдерінің форматы мен өтетін орны – қоғам мен мәдениет үшін қайта қаралатын кезеңге жеткенін айтты.

«Өнер ордасы – рухани биіктік пен шығармашылықты ту ететін киелі мекен. Алайда егер оның сахнасы жиі қаралы жиындар өтетін орынға айналса, бұл – алаңдатарлық жағдай. Мұндай үрдіс бір жағынан көрермен мен актер, сахна мен сана арасындағы байланысты әлсіретеді. Бұл пікірге кейбір зиялы қауым өкілдері реніш білдіруі мүмкін. Алайда мәселені эмоциямен емес, парасатпен қабылдайтын уақыт келді», - деп атап өтті министр.