Ақ үйде Газаның болашағы талқыланды, ал Израиль Палестина мемлекеті болмайтынын мәлімдеді

Жиынға бұрынғы кеңесшісі Джаред Кушнер, сондай-ақ Ұлыбританияның экс-премьері Тони Блэр қатысты. Дегенмен Ақ үй әзірге бұл кездесудің мазмұнына қатысты ресми түсініктеме берген жоқ.

New York Times деректеріне қарағанда, Трамп арнайы өкілі Стив Уиткофф пен Кушнермен бірге 90 минуттан астам уақыт кеңескен. АҚШ мемлекеттік хатшысы Марко Рубио да кездесудің кейбір бөлігіне қатысқан. Талқылауға Тони Блэрдің де шақырылуы бекер емес – оның зерттеу орталығы соңғы айларда Газаны қайта қалпына келтіру мәселесі бойынша түрлі тараптармен байланыс орнатқан.

NYT хабарлауынша, Трамп «Газаның жарқын болашағы» туралы айтқанымен, бұл болашақ жергілікті палестиналықтардың өздерін қамтуы міндетті емес. Ол аймақты «сәнді курортқа» айналдыру, кейде тіпті тұрғындарды басқа жерге көшіру туралы ой қозғаған.

Бұл идея 2024 жылдың басында-ақ Трамп ұсынған, бірақ қатаң сынға ұшырап, кейін тоқтатылған. Негізінде ол Кушнердің бір жыл бұрын көтерген ұсынысына үндес еді: Газаны палестиналықтардан «тазалап», Жерорта теңізінің жағалауын жылжымайтын мүлік пен курорт аймағына айналдыру.

Кушнер мен Блэрдің рөлі

Джаред Кушнер Трамптың алғашқы президенттік кезеңінде оның кеңесшісі болып, Израиль мен араб елдері арасындағы «Ибрахим келісімдеріне» жетекшілік еткен. Аймақта бизнес мүдделері де бар. Жақында ол Франция президенті Эммануэль Макронды «антисемитизмге бейім» деп айыптап, сынға алған болатын.

Тони Блэр де Таяу Шығыстағы процестерге белсенді араласып жүр. Алайда оның бастамаларында палестиналықтарды мәжбүрлі көшіру мәселесі көтерілмеген.

Израильдің ұстанымы: Палестина мемлекеті болмайды

Ақ үйдегі талқылаумен қатар, АҚШ мемлекеттік хатшысы Марко Рубио Израильдің сыртқы істер министрі Гидеон Саармен кездесті. Кездесуден кейін Саар «Палестина мемлекетіне қатысты ешқандай жоспар болмайды» деп мәлімдеді.

«Біз өзара мәселелер мен мүдделер бойынша тиімді кездесу өткіздік. Израиль үшін АҚШ-тан үлкен дос жоқ, ал АҚШ үшін Израильден сенімді одақтас жоқ», – деп жазды Саар әлеуметтік желіде.

Айта кетейік, дәл осы күндері Франция мен Ұлыбритания сияқты АҚШ пен Израильдің бірқатар одақтастары Палестина мемлекетін тану жоспарын талқылай бастаған болатын.

Газадағы жағдай

2023 жылдың қазанынан бері жалғасып келе жатқан Израиль шабуылдары салдарынан 62 мыңнан астам палестиналық қаза тапты. Аймақта аштық дағдарысы орын алып, халық босып кетті. Халықаралық соттарда Израильге қарсы геноцид және соғыс қылмыстары жөнінде айыптар тағылып жатыр, алайда Тель-Авив бұл айыптауларды мойындамайды.

Алдыңғы келіссөздер қысқа мерзімге атысты тоқтатуға мүмкіндік бергенімен, қақтығысты түбегейлі тоқтату жолы әлі табылмады. Израиль халықаралық сынға қарамастан, әскери операцияларын жалғастырып жатыр.