Жазылу
АҚШ Иранға қарсы соғыстың алғашқы күндерінде-ақ зымыран қорының едәуір бөлігін жұмсаған
АҚШ Иранға қарсы әскери операцияның алғашқы күндерінде бірнеше жылға жетуі тиіс стратегиялық маңызды оқ-дәрі қорын айтарлықтай жұмсап қойған.
Бұл туралы The Financial Times газеті дереккөздерге сілтеме жасап хабарлады.
Мәселе, ең алдымен, алыс қашықтыққа ұшатын «Томагавк» қанатты зымырандары туралы болып отыр.
Стратегиялық және халықаралық зерттеулер орталығының (CSIS) есебіне сәйкес, соғыстың алғашқы 100 сағатында АҚШ 168 «Томагавк» зымыранын қолданған. Америкалық конгрессмендердің бірі Financial Times басылымына бұл қорды толықтыруға бірнеше жыл қажет болуы мүмкін екенін айтқан.
Көпмиллиардтық шығын
Reuters агенттігінің мәліметінше, Иранмен соғыстың алғашқы алты күніндегі АҚШ шығыны кемінде 11,3 миллиард долларды құраған. Бұл деректер 11 наурыз күні Конгресте өткен жабық брифингте жарияланған.
Алдағы күндері Пентагон Ақ үй мен Конгреске қосымша 50 миллиард доллар көлемінде қаржыландыру сұрап ресми өтініш жолдамақ.
Соған қарамастан, Ақ үйдің баспасөз хатшысы Кэролайн Ливитт 12 наурызда АҚШ армиясында Дональд Трамп қойған мақсаттарға жету үшін оқ-дәрі мен қару жеткілікті екенін мәлімдеді.
