АҚШ-та Дональд Трамптың саясатына қарсы наразылық өтті

Наразылықтың басты ошақтарының бірі — Вашингтон қаласындағы Ақ үй маңы болды. Онда жүздеген адам "Трампқа импичмент" деген жазуы бар плакаттармен жиналды. Акцияға қатысқан Бенджамин Дуглас AFP агенттігіне берген сұхбатында:
«Әкімшілік заң үстемдігіне тікелей шабуыл жасап отыр. Кейбір тұлғаларға қарсы әрекеттер арқылы ксенофобияны қоздырып, заңдық кепілдіктерді бұзып жатыр», — деді.

Нью-Йорк қаласында наразылық білдірушілер Қоғамдық кітапхана алдына жиналды. 73 жастағы қатысушы Кэти Вали өзінің отбасы Холокосттан аман қалғанын айтып, қазіргі жағдайды нацизм дәуірімен салыстырды:
«Ата-анамның Адольф Гитлердің билікке келуі жайлы айтқандары қазіргі жағдаймен өте ұқсас», — деді ол.

Сан-Францискодағы Оушен-Бич жағалауында бірнеше жүз адам жиналып, денелерінен IMPEACH + REMOVE  деген жазуды бейнеледі. Кейбір шерушілер американ туын төңкеріп ұстады — бұл АҚШ-та төтенше жағдайдың белгісі ретінде қарастырылады.

Наразылық шерулерін 50501 деп аталатын ұйым ұйымдастырды. Бұл атау 50 штаттағы 50 шеруді және біртұтас қозғалысты білдіреді. Ұйым мәлімдемесінде 19 сәуірде бүкіл ел бойынша шамамен 400 акция өткізілгенін және олардың бейбіт сипатта өткені маңызды екенін атап өтті.

Айта кетейік, бұл Дональд Трампқа қарсы өткізілген алғашқы наразылық емес. Бұған дейін де 2024 жылдың қарашасында және 2025 жылдың басында оның миграциялық саясаты мен құқық қорғау органдарына қысым жасау әрекеттеріне қарсы бірнеше демонстрация ұйымдастырылған еді.

Ел ішінде Трамптың саясатына қарсылар саны артып келеді, ал сарапшылар мұндай наразылықтардың алдағы президенттік сайлау қарсаңында жиілей түсетінін болжаған.