Жазылу
АҚШ-та төтенше жағдай жарияланды
АҚШ президенті Доналд Трамп Куба үкіметінің әрекеттеріне байланысты елде ұлттық төтенше жағдай режимін жариялады. Тиісті жарлықта Куба билігінің саясаты мен іс-қимылы АҚШ-тың ұлттық қауіпсіздігі мен сыртқы саясатына «ерекше әрі әдеттен тыс қауіп» төндіретіні айтылған. Осыған байланысты президент арнайы экономикалық шараларды іске қосуды тапсырған.
Жарлыққа сәйкес, АҚШ әкімшілігі Кубаға мұнай жеткізетін елдерге қарсы қосымша тарифтер енгізу тетігін әзірлеуге кіріседі. Бұл шаралар Куба экономикасына жанама түрде қолдау көрсетіп отырған мемлекеттерге қысым жасауды көздейді. Ақ үй өкілдерінің мәлімдеуінше, мұндай қадам Гаванаға энергетикалық ресурстардың келуін шектеу арқылы оның саяси бағытына әсер етуді мақсат етеді.
Құжатта Куба басшылығы Вашингтонға қарсы бағытталған мемлекеттер мен ұйымдармен ынтымақтастық орнатып отырғаны атап өтілген. Атап айтқанда, Ресей, Қытай және Иранмен, сондай-ақ ХАМАС пен «Хезболла» қозғалыстарымен байланыстардың дамытылып келе жатқаны айтылады. АҚШ тарапының пікірінше, бұл байланыстар аймақтық тұрақтылыққа нұқсан келтіріп, Америка мүдделеріне қауіп төндіреді.
Төтенше жағдай режимін енгізу президентке Конгресс мақұлдауынсыз бірқатар экономикалық және қаржылық шектеулер қолдануға мүмкіндік береді. Сарапшылардың айтуынша, бұл шешім АҚШ пен Куба арасындағы қарым-қатынасты одан әрі ушықтыруы мүмкін. Сонымен қатар, Кубамен сауда немесе энергетикалық байланысы бар үшінші елдер де Вашингтонның қысымына тап болуы ықтимал.
Куба билігі бұл шешімге қатысты әзірге ресми мәлімдеме жасаған жоқ. Алайда Гавана бұған дейін АҚШ-тың санкциялық саясатын заңсыз және елдің егемендігіне қол сұғу деп бағалап келген.
