Жазылу
АҚШ Таяу Шығысқа мыңдаған теңіз жаяу әскерін жіберіп жатыр
Пентагон Иранға қарсы әскери операцияны кеңейту мүмкіндігіне дайындықты бастап кетті, алайда АҚШ құрлық әскерін енгізу туралы түпкілікті шешім әлі қабылданған жоқ.
Бұл туралы CBS және Reuters агенттіктері америкалық биліктегі дереккөздерге сілтеме жасап хабарлады.
Reuters мәліметінше, АҚШ Таяу Шығысқа қосымша күштер жіберіп жатыр — мыңдаған теңіз жаяу әскері мен әскери теңізшілер жөнелтілуде. Атап айтқанда, USS Boxer десанттық кемесі, оның экспедициялық бөлімшесі және ілеспе кемелер аймаққа бағытталған. Осыдан кейін өңірдегі америкалық әскерилердің жалпы саны 50 мыңнан асады.
Reuters нақтылауынша, бұл күштердің жіберілуі Иран аумағында бірден құрлық операциясының басталатынын білдірмейді. Екі америкалық шенеуніктің айтуынша, Иран территориясына әскер енгізу туралы шешім қабылданбаған, алайда бұл қадам Вашингтонның өңірдегі ықтимал әрекеттерін күшейтеді.
CBS мәліметіне сәйкес, Пентагонда ирандық әскери қызметкерлер мен қарулы топ өкілдерін ұстау сценарийлері, сондай-ақ құрлық операциясы басталған жағдайда оларды қайда орналастыру мәселесі де талқыланған. Бұл талқылауларға жедел әрекет ету күштері мен теңіз жаяу әскері бөлімшелері қатысуда.
Бұған дейін АҚШ президенті Дональд Трамп ашық түрде «ешқайда әскер жібермейтінін» айтқанымен, мұндай шешім қабылданса, жоспарды журналистерге жарияламайтынын да мәлімдеген. Reuters 19 наурыздағы сөзін келтіреді:
«Мен ешқайда әскер жіберіп жатқан жоқпын… біз қажет болғанның бәрін жасаймыз».
Reuters сондай-ақ қарастырылып жатқан нұсқалардың қатарында Ормуз бұғазы арқылы өтуді қамтамасыз ету және Иранның негізгі мұнай экспорты өтетін Харк аралы маңындағы ықтимал әрекеттер бар екенін хабарлады.
Осылайша, қазіргі таңда сөз нақты құрлық басқыншылығы туралы емес, АҚШ-тың әскери қатысуын күшейту және қақтығыс шиеленіскен жағдайда түрлі сценарийлерге дайындалу туралы болып отыр.
