АҚШ-тың Ядролық қауіпсіздік басқармасының 500 қызметкері жұмыстан босатылады

АҚШ Энергетика министрлігі Илон Маск басқаратын Үкімет тиімділігі департаментінің өтініші бойынша қысқартылатын 8,5 мың қызметкердің тізімін жасады, деп хабарлайды Bloomberg.

Тізімге сонымен қатар қызметі «екінші дәрежелі» деп саналатын Ұлттық ядролық қауіпсіздік басқармасының (NNSA) 3000 маманының 500-і кіреді. Бірақ олардың барлығы жұмыстан босатыла ма, жоқ па, әзірге белгісіз. Энергетика министрлігі түрлі нұсқаларды қарастырып жатқанын, әлі түпкілікті шешім қабылданбағанын айтты. Қазір министрлікте 17500 адам жұмыс істейді.

Associated Press агенттігінің хабарлауынша, жұмыстан кету қаупі бар мамандар АҚШ-тың ядролық зымырандарына қызмет көрсету және модернизациялаумен айналысады. Конгрессмен Марси Каптур мен сенатор Пэтти Мюррей жағдайға алаңдаушылық білдірді.

 "Ядролық қарудың қауіпсіздігі мен сенімділігін қамтамасыз ету міндеті жүктелген сарапшыларды жұмыстан шығару мүмкіндігі өте алаңдатады. Мұндай қауіпті қысқартулар болмауы керек. Біз бұл бос сөзді тоқтатуға шақырамыз", - делінген екі демократ саясаткердің бірлескен мәлімдемесінде.

Ақпан айында Трамп әкімшілігі Илон Маск басқаратын департамент жұмыстан шығарған NNSA-ның жүздеген қызметкерлерін қалпына келтіруге мәжбүр болды. Олардың ядролық қаруды басқарумен, өндіріс орындарында жұмыс істеуімен, мердігерлерді қадағалаумен айналысатыны белгілі болды. Энергетика министрі Крис Райт қысқарту қателік екенін мойындады. Сонымен бірге ол Джо Байден әкімшілігі кезінде департамент тым кеңейіп кеткенін, енді бұл мәселені шешу қажет екенін айтты. Энергетика министрлігі ядролық қарудан бөлек, су электр станцияларын басқару, радиоактивті қалдықтарды кәдеге жарату, электр желілерін жаңғырту, үйлерді жылу оқшаулау үшін грант бөлу сияқты салалармен де айналысады.

Масктың 2025 жылдың қаңтарында Трамп қызметіне кіріскеннен кейін құрылған бөлімі бюджеттік саланың 75 000 қызметкерін қысқартуға қол жеткізді - олар тамыз немесе қыркүйек айларында жалақыларын алу шартымен өз еркімен жұмыстан кетті. Бұл мемлекеттік қызметкерлердің шамамен 4 пайызын құрайды. The Washington Post басылымының жазуынша, федералды агенттіктердің тағы мыңдаған қызметкерлеріне осындай шарттар ұсынылған.