АҚШ Украинаға 425 миллион доллар көлеміндегі жаңа әскери көмек пакетін жариялады

Пентагонның қорынан берілетін қосымша көмекке NASAMS әуе қорғаныс зымырандық жүйелеріне арналған оқ-дәрілер, әуе шабуылына қарсы RIM-7 зымырандары, Stinger әуе қорғаныс зымырандары, «әуе-жер» оқ-дәрілері, HIMARS зымыран жүйелеріне арналған оқ-дәрілер, 155 мм және 105 мм артиллериялық оқ-дәрілер, кассеталық оқ-дәрілер, HMMWV әскери жол талғамайтын көліктері, Javelin және AT-4 танкке қарсы жүйелері, TOW оптикалық бағыттағы зымырандары, жеңіл тактикалық машиналар, атыс қарулары, оқ-дәрілер мен гранаталар, кедергілерді жоюға арналған құралдар мен оқ-дәрілер, қосалқы бөлшектер, сондай-ақ басқа техникалар, қызметтер, оқыту және тасымалдау кіреді.

«АҚШ Украинаға өз позицияларын нығайту, өз аумағын және халқын Кремльдің қатігез агрессиясынан қорғау, сондай-ақ әділ және ұзақ мерзімді бейбітшілікті қамтамасыз ету үшін қажетті техникамен қолдауға дайын. Президент Байден айқын жеткізгендей, біз құрған халықаралық коалициямен бірге Америка Құрама Штаттары Украинаға қолдау көрсетуді жалғастыра береді», – делінген Блинкеннің мәлімдемесінде.