Жазылу
Ақтөбе белсендісі Тоқаевтан көмек сұрады
«Байтақ» партиясының Ақтөбе облыстық филиалы төрағасының міндетін атқарушы Ерәділ Үббиниязов президентке видеоүндеу жолдап, өңірдегі мәселелерді шешуге орталықтан қолдау сұрады.
Белсендінің айтуынша, Ақтөбе облысында Мемлекет басшысының тапсырмалары толық орындалмай отыр. Ол жиналып қалған проблемаларды шешу үшін Астанадан арнайы комиссия жіберуді өтінді.
«Құрметті Қасым-Жомарт Кемелұлы, сіздің тапсырмаңыздың 90 пайызы өңірде орындалмай жатыр», - деді Үббиниязов.
Ол «Байтақ» партиясының Президент саясатын қолдайтынын және тапсырмалардың жүзеге асуына атсалысуға дайын екенін атап өтті. Дегенмен, партияға келіп түсетін көптеген шағым жергілікті деңгейде шешімін таппай отырғанын жеткізді.
Сонымен бірге, үндеу барысында белсенді Ақтөбе қаласының әкімі Азамат Бекетпен телефон арқылы сөйлесті. Әкім белсенділердің әлеуметтік желідегі жазбаларында Ақорда мен Президенттің ресми парақшаларын белгілейтініне наразылық білдірді.
