Алдын ала қорытынды бойынша "Жомарт" кенішіндегі апатқа метан газы себеп болған

Тергеу мәліметтеріне қарағанда жеті кеншінің өліміне себеп болған апатқа метан газының жарылуы себеп болған. 

"Комиссия тау-кен қазбасынан метанның жиналуы мен бөлінуі, содан кейін электр жабдықтарының ұшқынынан жарылыс болуы сияқты апаттың негізгі себебін анықтады. Сондай-ақ өнеркәсіптік қауіпсіздік пен еңбекті қорғау бойынша айтарлықтай ереже бұзушылықтар анықталып, жауапты тұлғалар тобы белгілі болды", - делінген тергеу қорытындысында.

Айта кетейік, 17 ақпанда Ұлытау облысы "Қазақмыс" корпорациясына қарайтын "Жомарт" кенішіндегі шахтада жарылыс болды. Оқиға салдарынан 7 шахта жұмысшысы үйінді астында қалып қойған. Кабельдердің үзілуіне байланысты жұмысшылармен байланыс болмағаны хабарланды. Кейіннен олардың барлығы қаза тапқаны белгілі болды.