Алматы облысы браконьерлермен қалай күреспекші?

 Мәселен, «Таза Қазақстан» экологиялық акциясы аясында тұқым жинау апталығы өткізілді. Облыс әкімдігінің тапсырмасына сәйкес, ұйымдастырылған бұл іс-шараға екі мыңнан астам адам қатысты. Олардың қатарында орман шаруашылығы қызметкерлері, белсенді жастар, жергілікті тұрғындар, мектеп оқушылары мен колледж студенттері бар.

Сөйтіп, Алматы облысының табиғи ресурстар және табиғатты пайдалануды реттеу басқармасының бастамасымен «Бақанас орман шаруашылығы» мекемесінің аумағында қара сексеуіл ағашының 2000 кг тұқымы жиналды. Оған қоса, жиде, шренк шыршасы және қайың ағаштарының 350 кг тұқымы тағы бар.

«Бұл акция табиғи ресурстарды қорғауға, ұрпаққа қалдыруға және экологиялық жауапкершілікті арттыруға бағытталған. Іс-шараның нәтижелері экологиялық мәдениетті қалыптастыру мен қоғамдағы жауапкершілікті арттыруға оң әсерін тигізетіні сөзсіз», – дейді облыстық әкімдіктің өкілі Қарлығаш Арыстанбекова.

Бұдан бөлек, 20 қазан мен 19 қараша аралығында браконьерлікпен күресуге және өңірдің биологиялық ресурстарын қорғауға бағытталған «Браконьер» атты жедел-профилактикалық іс-шара өтуде. Іс-шара табиғат қорғау заңнамасын бұзушылықтарды анықтауға және жолын кесуге, биоресурстардың заңсыз айналымына қарсы іс-қимылға және экологиялық қылмыстарды ашуға бағытталған.

«Бірінші онкүндікте табиғатты қорғау полициясының қызметкерлері 36 профилактикалық рейд өткізді, соның нәтижесінде 3 қылмыстық құқықбұзушылық тіркеліп, 64 әкімшілік материал жиналды. Анықталған фактілер негізінде қылмыстық істер қозғалды», – дейді Алматы облысы ПД ЖПҚБ ерекше тапсырмалар жөніндегі аға инспекторы Юрий Тоқтаров.

Алдағы уақытта да заңсыз аңшылық, балық ресурстарын браконьерлік жолмен өндіру, флора мен фаунаның сирек кездесетін және құрып кету қаупі төнген түрлерімен, олардың бөліктерімен немесе дериваттарымен заңсыз жұмыс істеу фактілері бойынша тергеу жүргізіледі. Тыйым салынған балық аулау және аң аулау құралдарының қолданысын шектеуге ерекше назар аударылады. Полицияның әрекеті құқықбұзушыларды ұстауға ғана емес, сонымен бірге экологиямен байланысты одан әрі қылмыстардың алдын алуға бағытталғанын атап өту маңызды. Өңір полициясы экологиялық заңнаманы бұзу қылмыстық және әкімшілік жауапкершілікке толы екендігіне назар аударады және мұндай әрекеттердің салдары аймақтың биоәртүрлілігі мен табиғи тепе-теңдігіне теріс әсер етуі мүмкін. Табиғатты қорғау шаралары мен полицияның жұмысы өте маңызды, бірақ азаматтардың табиғи байлықты сақтауға белсенді қатысуы одан да маңызды.

Және де өңірдегі қоқыс полигондарына қатысты жұмыстар да реттеліп жатыр. Осындай шаралар мен мақсатты әрекеттер экологияны жақсартуға, қоршаған ортаны сақтауға көмектеседі.

Ақжол Мейірбек

Алматы облысы