Жазылу
Алматыда 26 жастағы бокс бапкері көз жұмды: анасы полиция мен кафе қызметкерлерін айыптап отыр
БҚО-дан келген 26 жастағы бокстан жаттықтырушы 1 қараша күні тәрбиеленушілерімен бірге Алматыға жарысқа келген. 2 қарашада ол қаланың бір кафесіне тамақтануға кірген, алайда сол жерде жағдайы күрт нашарлаған.
Кафеде жағдайы нашарлап, есінен танып қалған
Марқұмның анасы Жанаргүл Махмұтованың айтуынша, ұлы кафеде отырғанда бірден құсып, есінен танып қалған. Бірақ кафе қызметкерлері жедел жәрдем шақырмаған, оның орнына полиция шақырған.
Ал келген полиция қызметкерлері де дәрігер шақыруға асықпай, оны “мас” деп есептеп, арнайы бейімдеу орталығына алып кеткен.
Анасы: «Ұлым ішпейді, шекпейді»
3 қарашада анасы ұлына қоңырау шалғанымен, телефонды басқа адам көтерген:
«Телефонды біреу көтеріп, өзін полиция деп таныстырды. “Телефонды тауып алдым, бәрі жақсы” деді. Кейін ғана ұлымның вытрезвительде жатқанын айтты».
Осыдан кейін отбасы наркоорталыққа бірнеше рет хабарласып, нақты ақпарат алуға тырысқан. Анасының сөзінше, Жандос салауатты өмір салтын ұстанған, ішімдік, темекі және өзге заттарды қолданбаған.
Бейімдеу орталығынан кейін бірден ауруханаға түсті
Сол күні оның туысы барып, Жандосты алып кеткен. Жігіттің жағдайының өте ауыр екенін көрген соң, бірден ауруханаға жеткізген. Дәрігерлер миға қан құйылғанын анықтаған, шұғыл операция жасаған.
Алайда Жандос комаға түсіп, 8 күннен кейін қайтыс болды.
Оқиғаның нақты мән-жайы мен полицияның әрекетіне қатысты сұрақтар көп. Жандос Махмұтовтың отбасы медициналық көмек көрсетілмегенін, уақыт жоғалғанын және немқұрайдылық қайғылы жағдайға әкелгенін айтады.
