Алматыда әл-Фараби даңғылындағы жол апатына байланысты хабар таратқан заңгер ұсталды

Алматы қалалық Полиция департаментінің хабарлауынша, азамат М.-ға қатысты көрінеу жалған ақпарат тарату фактісі бойынша сотқа дейінгі тергеу басталған. Қазіргі таңда күдікті уақытша ұстау изоляторына қамалып, іс бойынша тергеу амалдары жүргізіліп жатыр.

Алдын ала мәліметтерге сүйенсек, бұл жағдай жақында Аль-Фараби даңғылы бойында болған ірі жол апатынан кейін өрбіген. Аталған апат салдарынан үш адам қаза тапқан еді.

Журналист Михаил Козачков өзінің Telegram-арнасында жазғандай, Әділетхан Молдахан апатқа қатысты өз нұсқасын жариялап, бейнеүндеу жасаған. Бұл видео әлеуметтік желілерде кең таралып, шамамен 7 миллион қаралым жинаған.

Сонымен қатар, 30 наурыз күні ол Instagram желісінде өзін жәбірленуші тараптың өкілі ретінде таныстырып, оқиғаға қатысты бірқатар айыптаулар айтқан. Алайда сол күні кешке оның ұсталғаны туралы ақпарат тарады.

Қазіргі таңда құқық қорғау органдары істің барлық мән-жайын анықтап жатыр. Тергеу нәтижесі бойынша заңгердің әрекетіне құқықтық баға берілмек.