Алматыда тұмаумен ауырғандар арасында балалар көп

Сонымен қатар қазіргі көрсеткіштер бақылау деңгейінен төмен және әдеттегі эпидемиологиялық маусым шегінде қалып отыр.

Статистика қандай?

Қалалық санитариялық-эпидемиологиялық бақылау департаментінің мәліметінше, эпидмаусымның жетінші аптасында 15 050 ЖРВИ жағдайы тіркелген. Бұл:

• алдыңғы аптамен салыстырғанда 3,5%-ға төмен (15 594 жағдай);

• өткен жылдың осы кезеңімен салыстырғанда 32,5%-ға аз (21 779 жағдай).

Ауырғандардың 54,7%-ы – балалар. Жалпы 8 234 жағдай тіркелген.

Мектеп оқушылары арасында бір апта ішінде 155 мектепте 458 жағдай анықталған. Бұл қаладағы білім беру ұйымдарының 44,8%-ын қамтиды. Оқушылар арасындағы сырқаттанушылық шекті деңгейден (10%-ға дейін) аспайды.

Қандай вирустар таралуда?

Қалалық департамент басшысы Қасымхан Алпысбайұлының айтуынша, Алматыда:

• тұмаудың A/H3N2 түрі;

• риновирус;

• парагрипп;

• аденовирус;

• маусымдық коронавирус

тарап жатыр.

Тұмаудың A/H3N2 түрі бойынша 83 расталған жағдай тіркелген. Олардың барлығы екпе алмаған адамдар. Пациенттерге тиісті ем тағайындалып, жағдайлары қанағаттанарлық.