Алматыдағы жол апаты: рөлде кәсіпкер болғаны айтылып жатыр

Жол апаты 21 наурызға қараған түні әл-Фараби даңғылы мен Меңдіқұлов көшесінің қиылысында болған.

Алдын ала мәліметке сәйкес, Zeekr көлігі қарсы жолаққа шығып, Mercedes автокөлігімен бетпе-бет соғысқан.

Салдарынан:

– 29 жастағы жүргізуші;

– 22 және 20 жастағы екі жолаушы көз жұмды.

Ал Zeekr жүргізушісі түрлі жарақатпен ауруханаға жеткізілген. 

Күдікті туралы не белгілі

Әлеуметтік желілер мен бірқатар дереккөздерде Zeekr көлігін 32 жастағы алматылық кәсіпкер басқарғаны туралы ақпарат тарады.

Журналист Михаил Казачковтың мәліметінше, сөз Александр Пак туралы болуы мүмкін. Ол Алматының жоғарғы бөлігінде тұрады және көлік саласына қатысы бар екі компанияның құрылтайшысы ретінде көрсетіледі.

Атап айтқанда:

– «ГУ ХОЗУ Алматы» ЖШС (2025 жылы тіркелген, шамамен 500 мың теңге салық төлеген);

– «Глобал Партнер» ЖШС (2024 жылдың күзінен бері 50 млн теңгеден астам салық төлеген).

Сарапшылардың бағалауынша, апатқа қатысқан Zeekr көлігінің құны шамамен 100 мың долларды құрайды.

Айта кету керек, бұл мәліметтер әзірге ресми түрде толық расталған жоқ.

Куәгерлердің айтуынша, апат болған түні Zeekr көлігі басқа автокөлікпен жарысқа қатысқан болуы мүмкін.

Егер бұл дерек расталса, іс ауырлатылған баппен қаралуы ықтимал.

Қазіргі уақытта іс ҚР ҚК 345-бабы 4-бөлігі бойынша (жол қозғалысы ережесін бұзу, адам өліміне әкелу) тергелуде. Бұл бап бойынша жаза — 5 жылдан 10 жылға дейін бас бостандығынан айыру.

Қоғам реакциясы

Апат бірнеше күннен бері әлеуметтік желілерде қызу талқыланып жатыр. Қаза тапқандардың жақындары:

– ашық сот өткізуді;

– кінәлілерді қатаң жазалауды талап етуде.

Желі қолданушылары бұл істе әділдік болатынына күмән келтіріп, заңның бәріне бірдей қолданылуын талап етіп жатыр.