«Алтын адамды» тапқан тарихшы қайтыс болды

Бұл туралы Даниал Ахметов Instagram парақшасында хабарлады.

«Бүгін менің досым, еліміздің белгілі ғалымы, тарих ғылымдарының докторы, профессор Әбдеш Төлеубаев өмірден озды. Әбдеш Тәшкенұлы тәжірибелі дала зерттеушісі және экспедициялық жұмыстардың тамаша ұйымдастырушысы бола білді. Археологиялық ескерткіштерді анықтау және зерттеу бойынша белсенді қызмет атқарды. Ғылыми кітаптар мен мақалалар жазып, артынан зор мұра қалтырды. Соңғы 20 жылда ол Шығыс Қазақстанның Тарбағатай, Сауыр және Шыңғыстай тау бөктеріндегі археологиялық ескерткіштерді сәтті зерттеді. Әбдеш Төлеубаев әлемдік деңгейдегі жаңалықтарға иелік етеді. Ол алтыннан мыңдаған ерекше артефактілерді – ерте сақ дәуіріндегі ежелгі зергерлердің қолданбалы өнерін жинады. Мен Әбдеш Тәшкенұлы Төлеубаевтың туыстары мен жақындарына көңіл айтамын.Оның ардақты есімі мәңгілік жадымызда сақталады», — деп жазды ол.

Айта кетейік, Төлеубаев Әбдеш Тәшкенұлы. 1953 жылы 15 қарашада ҚХР Шәуешек қаласында туған. Қазақ. Тарих ғылымдарының кандидаты (1979), докторы (1992).

С.М. Киров атындағы Қазақ мемлекеттік университетінің тарих факультетін бітірген (1975), мамандығы — «Археология, этнография», тарихшы.

«Қазақтардың отбасылық ғұрыптарындағы мұсылмандық сенімге дейінгі белгі-бұйымдары» (1991) кітабының авторы; «Орынбор қазақтары (тарихи этнографиялық зерттеу)» (2003), «Қазақстанның археологиясы» (2007) кітаптарының; «Дала көсемдерінің қазыналары» (2004), «Қазақтың әдет-ғұрып, салт-дәстүрлері» (2002) кітап-альбомдардың; «Ежелгі Қазақстан тарихы» (2006), «Қазақстан тарихы» (2006, 2007) 6-шы, 10-шы және 11-ші сыныптарға арналған оқулықтардың; археология және этнология бойынша 100 астам ғылыми мақалалардың біріккен авторы. 

Шілікті өңірінде (ШҚО Зайсан ауданы) алғашқы сақ мәдениетіне жататын Қазақстандағы үшінші «Алтын адамды» тапқан (2003-2004). Шілікті «Алтын адамының» салтанатты-салттық киімінің ғылыми реконструкциясы бойынша авторлық куәліктің ізденушісі.

Ш.Ш. Уәлиханов атындағы бірінші сыйлығының лауреаты (2006). ҚР Үздік оқытушысы (2008). «Қазақстан ғылымының дамуына қосқан үлесі үшін» белгісімен марапатталған (2005).