Аляскадағы кездесу: Путин мен Трамп не талқылайды, Украина мен Еуропа қандай ұстанымда?

Путиннің талабы

Халықаралық басылымдардың дерегінше, бастапқыда Ресей президенті Қырым, Донецк, Луганск, Запорожье және Херсон облыстарын Ресей аумағы ретінде мойындату және Украинаның НАТО-ға қосылмау шарттарын ұсынған. Алайда кейінгі күндері оның талабы жұмсарғаны айтылуда – қазір негізгі басымдық Донецк облысына шоғырлануы мүмкін. Сарапшылардың пікірінше, Путин үшін ең бастысы – Трамппен жеке диалогты жалғастырып, санкциялардың күшеюіне жол бермеу.

Трамптың мақсаты

АҚШ президенті үшін басты міндет – сайлауалды уәдесін орындап, соғысты тоқтату. Ол бейбітшілік мәселесінде кез келген нұсқаны қарастыруға дайын. Трамп «әділ» деп санаған жағдайда «жер айырбастау» формуласын да талқылауы мүмкін. Сонымен қатар, Украинаға ұзақ мерзімді қауіпсіздік кепілдігін беру және Ресейге қарсы санкцияларды күшейту жоспары да күн тәртібінде тұр.

Украинаның ұстанымы

Киев кез келген шешім өз қатысуынсыз қабылданбайтынын қатаң ескертті. Президент Владимир Зеленский Украинаның халықаралық деңгейде мойындалған шекаралары қалпына келтірілмейінше және Ресей әскері шығарылмайынша келісім болмайтынын айтты. Сонымен бірге, Украина қауіпсіздік кепілдіктерін, оның ішінде НАТО-ға мүшелік мүмкіндігін талап етіп жатыр.

Еуропаның позициясы

Еуропалық одақ бұл келіссөздерге қатысуға ниетті және Украинаны айналып өтіп қабылданған кез келген шешімге қарсы. Германия канцлері Фридрих Мерц пен ЕО дипломатия басшысы Кая Каллас «Украинасыз бейбіт келісім болмайды» деп мәлімдеді. Еуропа үшін басты мәселе – Украинаның болашақ қауіпсіздігі және шекаралардың күшпен өзгермеуі. Сонымен бірге, ЕО қажет болса, Украинаға әскери қолдауды жалғастырып, Ресейге қарсы жаңа санкциялар енгізуге дайын екенін білдірді.