Жазылу
Андрей Бабиш: Чехия Украинаға қару үшін бір крон да бөлмейді
Чехиядағы парламент сайлауында жеңіске жеткен «Наразы азаматтар акциясы» (ANO) партиясының жетекшісі Андрей Бабиш Украинаға әскери көмек көрсету міндетін Чехиядан емес, Еуропалық Одақтан талап ету керек деп мәлімдеді.
České Noviny хабарлауынша, миллиардер әрі бұрынғы премьер-министр Андрей Бабиш 8 қазан күні Прагада өткен баспасөз мәслихатында егер оның партиясы парламенттің төменгі палатасында билік коалициясын құрса, Украинаға әскери көмек үшін бюджеттен қаржы бөлуді тоқтататынын айтты.
«Біздің еліміз Еуропалық Одақ бюджетіне 60 миллиард көлемінде жарна қосып отыр, ол қаражат Украинаға соғыс кезінде көмек ретінде жұмсалуда. Сондықтан Чехияның өз бюджетінен Украинаға бір крон да берілмейді. Біздің ақша Чехияға керек. Украинаға енді Еуропа арқылы қаржы берілсін», - деді саясаткер.
Бабиш: Снаряд сатып алу ісін НАТО шешуі керек
Сондай-ақ Андрей Бабиш Чехияның Украина армиясына арналған артиллериялық снарядтар мен оқ-дәрілер сатып алу бастамасын тоқтатуға уәде берді.
«Бұл бастама қарапайым нәрсе, бірақ мұндай мәселелерді қорғаныс альянсы ретінде тікелей НАТО шешуі тиіс», - деді ол.
Саясаткер бұл процесс ашық емес екенін және жеке компаниялар ондаған миллиард пайда тапқанын айтты, бірақ нақты деректер келтірмеді.
БАҚ мәліметінше, Украина 2024 жылы Чехия бастамасы аясында 1,5 миллион, ал 2025 жылы тағы 1,1 миллион артиллериялық снаряд алған.
Жалпы алғанда, бұл бастама Киевтің одақтастары қаржыландыратын 3,5 миллион снаряд сатып алу жобасын қамтиды.
Бұған дейін Чехияның сыртқы істер министрі Ян Липавский түсіндіргендей, ел бұл миссияны өз мойнына НАТО-ның мұндай операцияларды тікелей жүзеге асыратын механизмі жоқ болғандықтан алған.
Андрей Бабиш пен оның популистік ANO партиясы Чехиядағы соғысқа қарсы және ұлттық бюджетті қорғау ұранымен танылған. Оның мәлімдемесі Еуропада Украинаға көмек көрсету мәселесі бойынша пікір қайшылықтарының күшейіп келе жатқанын көрсетеді.
